Kiçik qız 11 şagirdin hücumuna məruz qaldı - VİDEO

Antalyanın Serik rayonunda yerləşən Merkez məhəlləsindəki bir ibtidai məktəbdə baş verən hadisə böyük narazılıq doğurub.

Sonxeber.az türk mediasına istinadən xəbər verir ki, noyabrın 30-da məktəbin həyətində bir araya gələn 11 şagird bir qız şagirdi hədələdikdən sonra ona fiziki zor tətbiq edib. Şiddətə məruz qalan azyaşlı baş verənləri ailəsinə danışıb və ailə dərhal polisə müraciət edib.

Polisin araşdırması zamanı məlum olub ki, hadisə anı mobil telefon kamerası ilə qeydə alınıb. Kadrlar araşdırıldıqdan sonra polis 11 şagirdin ifadəsini alaraq onları məhkəməyə göndərib. Lakin uşaqlar prokurorluqda ifadə verdikdən sonra sərbəst buraxılıblar. Eyni zamanda, Serik Rayon Təhsil Şöbəsi ailənin şikayəti əsasında araşdırmaya başlayıb.

Sosial şəbəkələrdə yayılan görüntülərdə qız və oğlan şagirdlərdən ibarət bir qrupun qız şagirdi hədələdiyi, daha sonra isə yumruq və təpik zərbələri endirdiyi, onu yerə yıxıb təpiklə vurduğu, saçından sürüdüyü açıq şəkildə görünür.

Telefon çəkilişində həmçinin bir oğlan şagirdinin siqaret çəkərək davanı izlədiyi, digər şagirdlərin isə "Yaxşı vur", "Başını yerə çırp", "Vurun, yazığınız gəlməsin" kimi ifadələr səsləndirdiyi eşidilir.

Hadisə ilə bağlı hüquqi və inzibati araşdırmalar davam edir.

Telegramda izləyin