Zooparkda ayı baxıcısına hücum edib - VİDEO

Çinin Hangzhou Safari Parkında nümayiş zamanı izləyicilərin nəfəsini kəsən gözlənilməz hadisə baş verib.

Sonxeber.az xarici mediaya istinadən xəbər verir ki, səhnəyə çıxarılan qara ayı qəfil nəzarəti itirərək baxıcısına hücum edib. Cəmi 46 saniyə davam edən hadisə tribunada böyük həyəcan və panikaya səbəb olub.

Məlumata görə, rutin bir şou zamanı baş verən hücum tamamilə gözlənilməz olub. Ayı bir anda aqressivləşərək baxıcının üstünə atılıb və hadisə saniyələr içində xaosa çevrilib. Tribunada qışqırıqlar yüksəlib, bir çox tamaşaçı qorxudan yerindən qalxa bilməyib.

Hadisəyə dərhal müdaxilə edən park əməkdaşları hücumu dayandırıb və ayı tez bir şəkildə səhnədən uzaqlaşdırılıb.

Park rəhbərliyi açıqlama yayıb. Bildirilib ki, hücuma məruz qalan baxıcının səhhəti yaxşıdır və təhlükəsizliyi dərhal təmin olunub. Hadisədən sonra qara ayı təhlükəsizlik protokollarına uyğun olaraq şoulardan müddətsiz çıxarılıb.

İlkin ehtimallara görə, hücum ayının şoudan əvvəl keçirilən yem toplama tədbirində ortamdakı qida qoxularından təsirlənməsi ilə bağlı ola bilər. Hadisə ilə bağlı araşdırma davam edir və parkda təhlükəsizlik tədbirlərinin artırılması üçün işlər başlanılıb.

Telegramda izləyin