İntihar kimi göstərilən hadisə əslində qətl imiş! Miras üçün ana, ata və qardaşını öldürdü

İzmirin Torbalı rayonunda ana, ata və oğulun həyatını itirdiyi, ilkin mərhələdə "intihar" kimi qiymətləndirilən dəhşətli hadisənin arxasından miras üstündə planlanmış qətl çıxdığı müəyyən edilib.

Sonxeber.az türk mediasına istinadən xəbər verir ki, verilən məlumata görə, bir evdən silah səsləri eşidilməsi barədə məlumat alan polis əməkdaşları ünvana gəldikdə dəhşətli mənzərə ilə qarşılaşıb. Evdə aparılan ilkin araşdırmada Sadi Avcı (67) və həyat yoldaşı Hatice Avcının (54) müxtəlif otaqlarda başlarından vurularaq öldürüldüyü, böyük oğulları Mehmet Avcının (33) isə salon hissəsində cansız halda tapıldığı müəyyən edilib. İlk dəyərləndirməyə əsasən, Mehmet Avcının valideynlərini qətlə yetirib daha sonra intihar etdiyi ehtimal edilmişdi.

Lakin Cinayət Büro və Suç Analiz Büro əməkdaşları hadisə yerini araşdırarkən, Mehmet Avcının meyitinin vəziyyəti və silahın mövqeyindən şübhələnib. İl Polis İdarəsinin tapşırığı ilə xüsusi istintaq qrupu yaradılıb.

İstintaq dərinləşdirildikdən sonra məlum olub ki, M.A. əvvəlcə evdə tək olan anasını, daha sonra evə çağırdığı atasını, sonda isə gələn böyük qardaşını öldürüb. Cinayətlərdən sonra isə hadisəyə " intihar" görüntüsü vermək üçün qardaşının olduğu otağı səliqəyə salıb, silahdakı barmaq izlərini silib və diqqət çəkmədən evdən ayrılıb.

Məlum olub ki, şübhəli maddi çətinliklər yaşayırdı və mirasa tək sahib olmaq məqsədi ilə ailəsini qətlə yetirib. M.A. polis tərəfindən saxlanıldıqdan sonra məhkəməyə çıxarılıb və həbs qətimkan tədbiri ilə təcridxanaya göndərilib. Hadisə ilə bağlı saxlanılan digər şübhəlilərdən S.A. (31) ifadəsindən sonra sərbəst buraxılıb, T.B. (28) isə məhkəmə nəzarəti şərti ilə azad edilib.

Hadisə ilə bağlı istintaq davam edir.

Telegramda izləyin