"Zamanla siyasi çəkisini itirmiş simaların yenidən iddia ilə çıxış etməsi praktiki nəticə doğurmur" - DEPUTAT

"Azərbaycan siyasi mühitində müxtəlif dövrlərdə fərqli təsir mərkəzlərinin formalaşması və onların ictimai fikrə yön verməsi haqqında müzakirələr heç vaxt dayanmayıb", - bunu Sonxeber.az -a açıqlama verən deputat Şahin Seyidzadə deyib:

"Bu müzakirələr həm hakimiyyət dairələrinə, həm də müxalif bloklara aid edilir. Xüsusilə son həftələr Ramiz Mehdiyev, Əli Kərimli, Cəmil Həsənli, Gültəkin Hacıbəyli kimi "keçmiş" siyasi simaların adı ətrafında yaranan fikirlər informasiya məkanında xüsusi yer tutur.

Ramiz Mehdiyev uzun illər Azərbaycan dövlət idarəçiliyində mühüm postlarda təmsil olunmuş, siyasi elitanın formalaşmasında böyük rol oynamış şəxslərdən biridir. Onun adı ətrafında "xarici təsirlərlə əlaqə" barədə vaxtilə olan iddialar bu gün artıq hüquqi müstəvidə baxılır. Bu fonda cəmiyyətin müəyyən seqmentlərində Mehdiyevin siyasi sistem daxilində yaratdığı şəbəkənin uzun illər müxtəlif dairələrin maraqları ilə üst-üstə düşdüyü barədə müzakirələr aparılır. Bu cür müzakirələrin yaranmasının səbəbləri bir neçə amillə izah olunur. Uzunmüddətli hakimiyyət təcrübəsi və geniş əlaqələr sistemi - bu, siyasi şərhçilər arasında onun "güc mərkəzlərindən biri" kimi qavranmasına səbəb olur. Elmi və ideoloji diskursun formalaşmasında fəaliyyəti - Mehdiyevin siyasi fikrə ideoloji təsir imkanları bir çoxları tərəfindən nəzərə alınır. Müxtəlif dövrlərdə region dövlətləri ilə münasibətlərdə aldığı rol - bu, bəzi dairələrdə onun xarici təsirlərə yaxınlığı barədə əsasların yaranmasına gətirib çıxarıb. Bütün bunlara baxmayaraq, əminliklə söyləmək olar ki, bu şəxs artıq siyasi meydanda "keçmişlər" siyahısındadır və "keçmiş" artıq "güc mərkəzi" deyil. "Keçmişlər" arasında Ramiz Mehdiyev "siyasi çəkisi olan" şəxs kimi qəbul olunsa da, digərləri onunla bir "keçmişlər" siyahısında "çəkisi olmayanlardır". Onların hər biri ayrıca bir şəxs olaraq xüsusi maraq yaratmır. Hər birinin bu gün və zamanlarda "siyasi çəkisi olan" bir şəxs kimi biruzə verməsi sadəcə imitasiya xarakteri daşıyır. Müxalifətin tərəfindən ortaya atılan fikirlər daha çox siyasi rəqabətin ritorik elementləri kimi qiymətləndirilir. Xüsusən müxalif düşərgədə yer alan çoxfiqurlu strukturların öz daxilində nüfuz bölgüsü aparması, müəyyən şəxslərin bir-birinə təsir imkanları barədə polemikaların yaranmasına səbəb olur. Səsləndirilən fiqurların adları son dövrdə müxalifət daxilində nüfuz mübarizəsinin mərkəzində dayanır. Onlar haqqında yayılan iddialar çox vaxt siyasi rəqabətin nəticəsi kimi meydana çıxır və müzakirələr ideoloji deyil, şəxsi nüfuz çəkişmələri fonunda formalaşır. Onların hər biri artıq çoxdan "keçmişlər" siyahısındadır.
Son zamanlar "keçmişlər" yenidən aktivləşib özlərini zəfər qazanmış hakimiyyətə güc hesab edirlər. Hakimiyyətə qayıtmaq cəhdlərlə çıxış edirlər. Nəzəri cəhətdən cəhdlər ola bilər, lakin praktiki olaraq onların "siyasi çəkisi" olub-olmamağından asılı olmayaraq, onlar artıq "keçmişdirlər".

Telegramda izləyin