Şüşədə yağ, içində sual işarəsi... Etiketə inan bədəninə dua et

Supermarketlərdə yüzlərlə çeşid günəbaxan, qarğıdalı, zeytun yağları satılır. Hər birinin üzərində 100% təbii olduğu yazılır. Lakin məhsulu aldıqda isə keyfiyyətinin o olmadığını görürük. Ölkəmizdə duru yağlar yerli istehsal ilə yanaşı, Rusiya, Türkiyə, Ukrayna, Sinqapur kimi ölkələrdən idxal olunur.

Həttda mağazada satılan ən bahalı yağı belə aldıqda yemək bişirən zaman yağın öz-özünə buxarlandığını, həmin yağdan hazırlanan yeməyi isə yedikdə mədədə qıcqırma, ağrı hissindən həmin yemək həzm olunanadək özümüzə gələ bilmirik. Belə olduqda isə aldığımız yağın həqiqətən üzərində qeyd olunduğu kimi, günəbaxandan, qarğıdalıdan yoxsa zeytundan əldə olunduğu böyük şübhə doğurur. Beləki, duru yağların əksəriyyətinin tərkibi hidrogenləşdirilmiş, trans yağlardan ibarətdir.
Mövzu ilə bağlı qida eksperti Amalya Rəhimova BiG.AZ-a açıqlamasında bildirdi ki, supermarketlərdə satılan duru yağların əhəmiyyətli hissəsi keyfiyyət standartlarına tam cavab vermir. Onun sözlərinə görə, bəzi istehsalçılar maya dəyərini azaltmaq üçün xammalın mənşəyinə və emal prosesinə lazımi nəzarət göstərmir: "Rəngsizləşdirmə və dezodorasiya prosesi düzgün aparılmadıqda yağlar vizual olaraq normal görünsə də, tərkib baxımından sağlamlıq üçün risk yarada bilər.

Etiket üzərində göstərilən məlumatlarla real tərkib arasında uyğunsuzluqlar müşahidə olunur və bu da istehlakçının aldadılmasına səbəb olur. Duru yağ bazarında ciddi laborator nəzarət və müstəqil yoxlamalar aparılmadıqca keyfiyyət problemi qalmaqda davam edəcək".

Telegramda izləyin