"Londondan gələn mesaj Rusiyanın "güclənməsi"nin tərif yox, xəbərdarlıq olduğunu göstərir" - ŞƏRH

Britaniya Silahlı Qüvvələrinin Müdafiə Qərargahının rəisi, Hava Qüvvələrinin Baş Marşalı Riçard Nayton Rusiya qüvvələrinin sürətlə güclənməsindən narahat olduğunu bildirib.

Bəs görəsən bu narahatlığın səbəbi nədir?

Politoloq Tural İsmayılov bu barədə Sonxeber.az -a açıqlama verib:

"Britaniya tərəfinin bu çıxışı narahatlıqdan çox soyuq hesabın üzərinə çəkilmiş qalın ritorikadır. Rusiya son illər hərbi gücünü artırmaqla özünü müdafiə edən yox, təhlükə istehsal edən aktor kimi aparır və Londonun mesajı da məhz buna yönəlib. Moskva beynəlxalq hüququ kənara qoyaraq güc dilini normaya çevirməyə çalışır, bu isə regional balansları dağıdır.

Rusiya ordusunun sürətli silahlanması arxasında modernləşmə yox, uzanan müharibənin yaratdığı məcburiyyətlər dayanır. Kreml iqtisadiyyatı faktiki olaraq hərbi relslərə salıb və bu, uzunmüddətdə ölkə üçün inkişaf yox, tükənmə modeli yaradır. Britaniyanın narahatlığı həm də buradan qaynaqlanır: nəzarətsiz militarizasiya Rusiyanı daha rasional yox, daha riskli oyunçuya çevirir.

Üstəlik, Moskva öz güclənməsini strateji sabitliyə töhfə kimi təqdim etsə də, reallıqda bu proses təhlükəsizlik arxitekturasını aşındırır. Rusiya dialoq və etimad quruculuğu əvəzinə təzyiq və hədələmə alətlərinə üstünlük verir. Bu isə onu beynəlxalq sistemdə etibarlı tərəfdaşdan çox, proqnozlaşdırılması çətin problem mənbəyinə çevirir.

Bir sözlə, Londondan gələn mesaj Rusiyanın "güclənməsi"nin tərif yox, xəbərdarlıq olduğunu göstərir. Kreml üçün əsas risk Qərbin reaksiyası yox, öz seçdiyi bu militarist yolun Rusiyanı getdikcə daha dərin geosiyasi təcridə sürükləməsidir"

Telegramda izləyin