Qocalar evinin işçisi yaşlı kişini döyərək öldürüb - VİDEO

İstanbulun Böyükçəkməcə rayonunda fəaliyyət göstərən Özəl Böyük Marmara Qocalar evində 2023-cü ilin iyul ayına aid olduğu bildirilən görüntülər cəmiyyətdə böyük rezonans doğurub.

Sonxeber.az türk mediasına istinadən xəbər verir ki, görüntülərdə yaşlı kişinin "Səhərdən bəri məni döyürlər" dediyi, bir şəxsin isə əlcək taxaraq ona şiddət göstərdiyi görünür. İddialara görə, kadrlarda əks olunan şəxs qocalar evinin sahibinin həyat yoldaşı Erol Konukdur və şiddətə məruz qalan yaşlı şəxsin Abdulkadir Taşar olduğu bildirilir.

Kayıtlarda Taşarın, "Səhərdən bəri məni döyürlər. Şillə vurdular. Məni anam-atam bu qədər döyməyib" sözlərini söylədiyi eşidilir. Bu ifadələrdən sonra Erol Konukun "Harana vurdular, göstər!" deyə qışqırdığı, yanındakı işçidən əlcək istəyərək yaşlı adama fiziki zorakılıq tətbiq etdiyi anlar da görüntülərə düşüb. Hadisə izləyənlərin vicdanını sızladıb.

Veryansın portalının jurnalisti Erdem Atayın xəbərinə görə, şiddətə məruz qaldığı iddia edilən Abdulkadir Taşar 2024-cü ilin sentyabr ayında xəstəxanada vəfat edib. Lakin ölümündən sonra meyitin yarılması aparılmadığı da iddia olunur.

Məsələ ilə bağlı açıqlama verən qocalar evinin rəhbərliyi, Erol Konukun bir daha müəssisəyə buraxılmayacağını bildirib. Digər tərəfdən, Konukun qocalar evindən ayrılan bəzi işçiləri və onu şikayət edən şəxsləri hədələdiyi də iddia edilir. Bildirilir ki, o, "Səni İstanbulda yaşatmaram" kimi ifadələrlə işçiləri qorxutmağa çalışıb.

Hadisə ilə bağlı ictimaiyyətin reaksiyası artarkən, məsələnin hüquqi müstəvidə araşdırılması tələbi də gündəmə gəlib.

Telegramda izləyin