"20 min insanın azadlığa çıxması ailələrə böyük sevinc gətirəcək" - AÇIQLAMA

Azərbaycan Respublikasının Prezidenti tərəfindən Azərbaycan Respublikasının Milli Məclisinə təqdim olunan Amnistiya aktının tətbiq ediləcəyi şəxslərin, o cümlədən azadlıqdan məhrumetmə cəzasından azad ediləcək məhkumların sayına görə ən böyük amnistiya olacağı ehtimal edilir.

Belə ki, amnistiya aktının ümumilikdə 20 mindən çox şəxsə şamil ediləcəyi gözlənilir. Bunlardan 5 mindən çox məhkumun azadlıqdan məhrumetmə cəzasından azad ediləcəyi, həmin cəzaya məhkum olunmuş 3 mindən artıq şəxsin cəzasının azaldılacağı, 7 mindən çox məhkumun azadlığın məhdudlaşdırılması cəzasından, 4 minə yaxın məhkumun azadlıqdan məhrumetmə ilə bağlı olmayan digər cəzalardan və ya şərti tətbiq edilmiş cəzalardan, habelə mindən çox şəxsin cinayət məsuliyyətindən azad ediləcəyi proqnozlaşdırılır.

"Cənab Prezident tərəfindən verilən amnistiya haqqında sərəncamı alqışlayıram. Kimliyindən və düşüncəsindən asılı olmayaraq, 20 min insanın azadlığa çıxması suverenlik və Konstitusiya prinsipləri çərçivəsində ailələrə böyük sevinc gətirəcək" - bunları Sonxeber.az -a açıqlama verən insan haqları müdafiəçisi Novella Cəfəroğlu deyib:

"Mənim istəyim budur ki, jurnalistlər, bloqerlər, partiya fəalları, Nardaran işi üzrə həbs olunan dindarlar (20 ildən artıq həbsdə olanlar), müharibə veteranları və vətəndaş cəmiyyətinin bir neçə üzvü də bu amnistiya ilə azad edilsin. Çox istərdim ki, əfv fərmanına da salınsınlar ki, kənardan bizə qarşı olan hücumlardan qurtula bilək.

Mən beynəlxalq insan haqları təşkilatları məsələsinə də toxunuram. Bu gün bizim üçün ən vacib olan birliyimizdir. Hamımız bir olmalıyıq. Çünki dünyada mövcud olan gərginliklər fonunda yalnız birlikdə güclü ola bilərik".

Telegramda izləyin