Konsert zamanı dəhşət: gənc rok müğənnisini səhnədə elektrik cərəyanı vurdu - VİDEO

Perunun paytaxtı Limada keçirilən konsert zamanı qorxulu anlar yaşanıb.

Sonxeber.az türk mediasına istinadən xəbər verir ki, rok qrupu Mi Major Amigo Scott (My Best Friend Scott) qrupunun solisti olan Karlos Suares səhnədə özünü təqdim etdiyi anda mikrofonu əlinə götürüb və bu zaman elektrik cərəyanına məruz qalıb. İzdihamla dolu barda baş verən hadisə tamaşaçılar arasında böyük panikaya səbəb olub.

Görüntülərdə elektrik cərəyanının təsiri ilə geri çəkilərək səndələyən gənc müğənninin bir neçə saniyə sonra yerə yıxıldığı və qıvrandığı görünür. Təxminən 10 saniyə ərzində cərəyanın Suaresin bədənini iflic etdiyi müşahidə olunub. Hadisə anında mikrofondan qığılcımların çıxdığı, tamaşaçıların isə panik içində "Cərəyan var!" deyə qışqırdığı kameralara əks olunub.

Səhnədə olan bir səs texniki və başqa bir musiqi qrupunun üzvü dərhal müdaxilə edərək mikrofonun fişini çıxarıb və elektrik cərəyanını kəsiblər. Mütəxəssislər bu sürətli müdaxilənin daha ağır faciənin qarşısını aldığını bildiriblər.

Elektrik cərəyanına qapılan Karlos Suares dərhal xəstəxanaya aparılıb. Həkimlər gənc müğənninin boyun nahiyəsində birinci dərəcəli yanıq xəsarətləri yarandığını açıqlayıblar.

Hadisədən sonra açıqlama verən və "Mono" (Meymun) ləqəbi ilə də tanınan Karlos Suares yaşadıqlarını "son dərəcə travmatik" kimi qiymətləndirərək, "Həyatımı itirməyə çox yaxın idim" deyib. O, daha sonra "Instagram" hesabında paylaşdığı video ilə səhhətinin yaxşı olduğunu bildirərək pərəstişkarlarını sakitləşdirib.

Telegramda izləyin