"Amnistiya aktı məhkumların cəmiyyətə yenidən inteqrasiya imkanlarının yaradılması baxımından da mühüm əhəmiyyət daşıyır" - AÇIQLAMA

"Möhtərəm cənab Prezident İlham Əliyevin "Konstitusiya və Suverenlik İli" çərçivəsində amnistiya elan olunması təşəbbüsü dövlətimizin gücünü, humanist dəyərlərə sadiqliyini və hüquqi dövlət prinsipinə verdiyi önəmi bir daha nümayiş etdirir. Bu təşəbbüs, ilk növbədə, müstəqil Azərbaycanın hüquqi təməli olan Konstitusiyamızın ali hüquqi qüvvəsinin ölkənin bütün ərazilərində tam bərqərar olmasının məntiqi nəticəsidir".

Bu sözləri Sonxeber.az-a Milli Məclisin deputatı, Ana Vətən Partiyasının sədr müavini Günay Ağamalı danışıb.

O, açıqlamasında qeyd edib ki, Ulu Öndər Heydər Əliyevin müəyyənləşdirdiyi dövlətçilik fəlsəfəsinə uyğun olaraq, Möhtərəm cənab Prezident İlham Əliyevin rəhbərliyi ilə həyata keçirilən bu addım humanizm, mərhəmət və sosial ədalət prinsiplərinə söykənir:

"Amnistiya aktı məhkumların cəmiyyətə yenidən inteqrasiya imkanlarının yaradılması baxımından da mühüm əhəmiyyət daşıyır. Xüsusilə qeyd etmək istərdim ki, 44 günlük Vətən müharibəsində və antiterror əməliyyatlarında iştirak etmiş şəxslərin, habelə şəhid ailələrinin və müharibə nəticəsində zərər çəkmiş vətəndaşların bu amnistiya aktında nəzərə alınması dövlətin öz vətəndaşına verdiyi yüksək dəyərin bariz nümunəsidir. Sözügedən təşəbbüs eyni zamanda Zəfər və suverenlik anlayışlarının mənəvi və hüquqi məzmun daşıdığını göstərir.

Bir məqamı xüsusi olaraq qeyd etmək lazımdır ki, ümumilikdə, 1995-ci ildən etibarən qəbul edilən 12 amnistiya aktı 130 mindən çox şəxsə şamil edilib. Dahi rəhbər Ulu Öndər Heydər Əliyevin 1995-2003-cü illəri əhatə edən müvafiq təşəbbüsləri əsasında 32 əfv sərəncamı və 7 amnistiya aktı qəbul edilmişdir. Bu mütərəqqi prinsip hər zaman Möhtərəm cənab Prezident İlham Əliyevin yanaşmalarında da öz əksini tapmış və göründüyü kimi, hər bir amnistiya aktı zamanla daha çox şəxsə şamil edilir. Dövlət başçısı 2003-2025-ci illərdə 39 əfv sərəncamı və 5 amnistiya aktı qəbul etmişdir. Eyni prinsiplə Birinci vitse-prezident Mehriban xanım Əliyeva Milli Məclisin deputatı olduğu müddət ərzində - 2007, 2013 və 2016-cı illərdə - çıxış edərək məhz onun təşəbbüsü ilə amnistiya aktlarının qəbul olunmasına nail olmuşdur. Bütün bunlar formalaşmış ənənənin necə sağlam təməl üzərində qurulduğunun göstəricisidir".

Deputat onu da vurğuladı ki, indiki halda iyirmi mindən artıq şəxsi əhatə edəcək amnistiya təşəbbüsü dövlət-vətəndaş münasibətlərində yeni etimad mərhələsi yaradacaq, cəmiyyətdə sosial həmrəyliyin güclənməsinə, hüquq sisteminə etimadın daha da artmasına öz töhfəsini verəcək:

"Bu humanist təşəbbüsün Yeni il və Dünya Azərbaycanlılarının Həmrəyliyi Günü ərəfəsində irəli sürülməsi xüsusi mənəvi məna daşıyır. Amnistiya aktı iyirmi mindən çox ailəyə bayram sevincinin yaşadılmasına, ümid və inam hissinin güclənməsinə səbəb olacaq. Bu addım bir daha təsdiq edir ki, Möhtərəm cənab Prezident İlham Əliyev hər bir vətəndaşın taleyinə həssas yanaşır, onların sosial rifahını, mənəvi rahatlığını və cəmiyyətə yenidən qazandırılmasını daim diqqət mərkəzində saxlayır. Dövlət başçısının bu yanaşması güclü dövlətin güclü vətəndaşa söykəndiyini, milli həmrəyliyin insan amilinə verilən dəyər üzərində formalaşdığını aydın şəkildə nümayiş etdirir".

Vüsalə İbrahimli

Telegramda izləyin