Səhər gəzintisinə çıxan qadın 31 şagirdin həyatını xilas edib

Bursanın Nilüfer rayonunda səhər saatlarında gəzintiyə çıxan yaşlı bir qadının "sürüşmə var" deyə xəbər verdiyi istinad divarı və ona bitişik gəzinti yolu 9 saat sonra məhəllədə yerləşən məscidin və eyni həyətdə fəaliyyət göstərən Quran kursunun üzərinə uçub.

Sonxeber.az türk mediasına istinadən xəbər verir ki, vaxtında görülən tədbirlər sayəsində Quran kursunda olan 4-6 yaş arası 16 uşaq və 15 orta yaşlı qadın olmaqla, ümumilikdə 31 nəfər faciədən xəsarət almadan xilas olub.

Hadisə Nilüfer rayonunun Köşk küçəsində yerləşən Mövlana Məscidində baş verib. Məscidin arxa həyətinin üstündən keçən yol, ona bağlı gəzinti zolağı və həyətə inşa edilən istinad divarında sürüşmə olduğunu səhər gəzintisi zamanı görən yaşlı qadın dərhal Nilüfer rayon bələdiyyəsinə zəng edərək vəziyyətlə bağlı məlumat verib.

Bunun ardınca bələdiyyə əməkdaşları Mövlana Məscidi Dərnəyinin sədri, 69 yaşlı Hamit Kara və Quran kursunun qadın məsul şəxsi ilə əlaqə saxlayaraq hadisə barədə xəbərdarlıq ediblər. Əraziyə polis, yanğınsöndürmə əməkdaşları cəlb olunub. Aparılan baxışlardan sonra sürüşmə riski olan yol nəqliyyat üçün bağlanıb.

Eyni zamanda məscidə bitişik Mövlana Məscidi Quran kursunda təhsil alan 16 uşaq və 15 qadın əməkdaş təxliyə edilib. Günorta namazından sonra məscid ibadətə bağlanıb, Quran kursunda isə dərslər dayandırılaraq bütün zəruri təhlükəsizlik tədbirləri görülüb.

Telegramda izləyin