Alışqan doldurmaq istəyən qadının özü də yandı, evi də! - VİDEO

Kocaelinin Derince rayonunda alışqanını doldurmaq istəyən 77 yaşlı qadın yanğına səbəb olub.

Sonxeber.az türk mediasına istinadən xəbər verir ki, hadisə Derince rayonunun Mersincik məhəlləsi, Həyat küçəsində baş verib. Oğlu Ferhat Gündağ ilə birlikdə yaşayan Hamide Gündağ (77) evdə tək olduğu vaxt alışqanı qazı ilə doldurmaq istəyib. Bu zaman baş verən alovlanma nəticəsində yaşlı qadının əllərində, üzündə, ayaqlarında və bədəninin müxtəlif hissələrində yanıq xəsarətləri yaranıb.

Alovlanmadan dərhal sonra evdə yanğın başlayıb. Mətbəxdə olan qaz balonunun da partlaması ilə alovlar qısa zamanda daha da güclənib. Yanğının başladığı an yoldan keçən polis əməkdaşları vəziyyəti görərək dərhal evə yaxınlaşıblar. Məhəllə sakinlərinin köməyi ilə yaşlı qadın çətinliklə də olsa evdən çıxarılıb.

Hadisə yerində təcili tibbi yardım avtomobilində ilkin tibbi yardım göstərilən Hamide Gündağ daha sonra başqa bir təcili yardım maşını ilə müalicə üçün Kocaeli Şəhər Xəstəxanasına aparılıb.

Yanğınsöndürənlərin müdaxiləsi nəticəsində yanğın qısa müddətdə nəzarət altına alınaraq söndürülüb. Yanğından sonra evin böyük hissəsinin istifadəyə yararsız vəziyyətə düşdüyü bildirilib.

Faktla bağlı aidiyyəti qurumlar tərəfindən araşdırmalara başlanılıb.

Telegramda izləyin