Alüminium qabı ilə birlikdə udduğu həb 4 il sonra ağciyərindən çıxarıldı

Antalyada 75 yaşlı Sahibe Güzin Zeybekoğlunun 4 il əvvəl diqqətsizlik nəticəsində alüminium qabı (blisteri) ilə birlikdə udduğu həb bronxoskopik üsulla ağciyərindən çıxarılıb.

Sonxeber.az türk mediasına itinadən xəbər verir ki, Zeybekoğlu, "Şiddətli öskürək və həddindən artıq bəlğəm şikayətlərim var idi, sonradan məlum oldu ki, həb ağciyərimə gedib" deyə zarafat edib.

Hadisə 2021-ci ildə baş verib. Covid-19 səbəbilə həyat yoldaşı ilə birlikdə xəstəxanaya yerləşdirilən Sahibe Güzin Zeybekoğlu, 5 gün sonra həyat yoldaşını itirib. Yaşadığı dərin kədər və dalğınlıq səbəbindən dərmanını qabından çıxarmadan udan qadın, həmin an boğazında ağrı hiss etsə də, həbin mədəsinə düşdüyünü düşünərək buna əhəmiyyət verməyib.

Covid müalicəsindən sonra xəstəxanadan buraxılan Zeybekoğlu, zamanla öskürək və bəlğəm şikayətlərinin artması səbəbilə yenidən həkimə müraciət edib. Aparılan müayinələrdə ağciyərində düyün aşkar edilsə də, tətbiq olunan dərman müalicələri nəticə verməyib. Şikayətləri daha da şiddətlənən qadın başqa bir xəstəxanaya müraciət edib.

Burada aparılan döş qəfəsi tomoqrafiyasında ağciyərdə şübhəli lezyon aşkarlanıb və xəstə Akdeniz Universiteti Tibb Fakültəsinin Ağciyər Xəstəlikləri şöbəsinə yönləndirilib. Doç. Dr. Fatih Üzer və Dr. Aliye Gamze Çalış tərəfindən aparılan bronxoskopiya zamanı lezyonun əslində alüminium qab içində qalmış həb olduğu müəyyən edilib.

Təxminən 20 dəqiqə davam edən müdaxilədən sonra Sahibe Güzin Zeybekoğlu 4 il ərzində ağciyərində daşıdığı yad cisimdən xilas olub.

Telegramda izləyin