Arvadını küçənin ortasında qətlə yetirdi, sakitcə hadisə yerindən uzaqlaşdı

Türkiyənin Adıyaman vilayətinin Kahta rayonunda dəhşətli ailədaxili zorakılıq hadisəsi baş verib. Boşanma mərhələsində olduğu həyat yoldaşı tərəfindən küçənin ortasında bıçaqlanan qadın xəstəxanada dünyasını dəyişib. Hadisədən sonra şübhəli şəxsin heç nə olmamış kimi hadisə yerindən uzaqlaşması diqqət çəkib.

Sonxeber.az türk mediasına istinadən xəbər verir ki, ilkin məlumata görə, M.A. boşanma ərəfəsində olduğu 45 yaşlı həyat yoldaşı Emine Aluçu küçədə yaxalayaraq sinə və boğaz nahiyəsindən bıçaqlayıb. Hücum zamanı cütlüyün adları açıqlanmayan azyaşlı qız övladı da xəsarət alıb. Azyaşlı qız anasını qan içində görərək ağır psixoloji sarsıntı keçirib.

Ətrafdakı vətəndaşların məlumatı əsasında hadisə yerinə təcili tibbi yardım və polis əməkdaşları cəlb olunub. Ağır xəsarətlər alan Emine Aluç ilkin tibbi müdaxilədən sonra Kahta Dövlət Xəstəxanasına çatdırılıb. Lakin həkimlərin bütün səylərinə baxmayaraq, onun həyatını xilas etmək mümkün olmayıb.

Hadisə anları ətrafdakı vətəndaşlardan birinin mobil telefon kamerası ilə saniyə-saniyə lentə alınıb. Görüntülərdə M.A.-nın həyat yoldaşını övladının gözü qarşısında bıçaqladıqdan sonra soyuqqanlı şəkildə, rahat hərəkətlərlə hadisə yerindən uzaqlaşdığı əks olunub.

Məlumata görə, şübhəli şəxs hadisə yerindən qaçıb. Onun saxlanılması üçün polis əməkdaşları tərəfindən genişmiqyaslı axtarış tədbirləri həyata keçirilir. Faktla bağlı istintaq davam edir.

Telegramda izləyin