"Onun siyasətində praqmatizm, milli maraqlar və beynəlxalq hüquq əsas xətt kimi çıxış edir" - AÇIQLAMA

"Bu gün Azərbaycan Respublikasının Prezidenti, Ali Baş Komandan İlham Əliyevin doğum günü təkcə bir təqvim hadisəsi deyil, müasir Azərbaycan dövlətçiliyinin keçdiyi yolun və əldə etdiyi nəticələrin dəyərləndirilməsi üçün mühüm fürsətdir. Prezident İlham Əliyevin rəhbərliyi ilə Azərbaycan son onilliklərdə mürəkkəb geosiyasi mühitdə milli maraqlarını qətiyyətlə qoruyan, regional və qlobal miqyasda söz sahibi olan güclü dövlətə çevrilib".

Bunu Sonxeber.az-a politoloq Tural İsmayılov danışıb.

O, açıqlamasında qeyd edib ki, onun liderliyi dövründə ölkədə siyasi sabitlik möhkəmlənib, iqtisadi dayanıqlıq təmin olunub, enerji və nəqliyyat layihələri ilə Azərbaycan Avrasiyanın strateji xəritəsində mühüm mövqe qazanıb:

"Ən başlıcası isə tarixi ədalət bərpa olunub, ərazi bütövlüyü təmin edilib və Azərbaycan xalqı qalib dövlətin vətəndaşı kimi yeni mərhələyə qədəm qoyub. Bu, yalnız hərbi qələbə deyil, uzunmüddətli siyasi iradənin, strateji səbrin və dövlət ağlının nəticəsidir.

Prezident İlham Əliyev idarəetmədə klassik dövlətçilik ənənələri ilə müasir çağırışları uzlaşdıran lider modelini formalaşdırıb. Onun siyasətində praqmatizm, milli maraqlar və beynəlxalq hüquq əsas xətt kimi çıxış edir. Bu yanaşma Azərbaycanın gələcək inkişafı üçün etibarlı zəmin yaradır.

Bu əlamətdar gündə dövlət başçısına möhkəm cansağlığı, uzun ömür və Azərbaycan dövlətçiliyinin daha da güclənməsi naminə uğurlu fəaliyyət arzulayırıq".

Telegramda izləyin