Çaya düşən 2 yaşlı uşaq balıqların hücumu nəticəsində həyatını itirib

Braziliyanın Amazonas ştatına bağlı Coari şəhərində dəhşətli hadisə baş verib.

Sonxeber.az xarici mediaya istinadən xəbər verir ki, evinin yaxınlığındakı çaya düşən 2 yaşlı qız uşağı pirana balıqlarının hücumuna məruz qalaraq həyatını itirib.

Məlumata görə, Clara Vitoria adlı azyaşlı uşaq ailəsi ilə birlikdə çay yaxınlığında yerləşən üzən tikilidə yaşayırmış. Evin ətrafında uşağın suya düşməsinin qarşısını alacaq hər hansı çəpər və ya məhəccər olmadığı bildirilib. Clara evin çölündə dolaşdığı zaman tikilidəki açıq bir boşluqdan çaya düşüb.

Bir müddət sonra qızlarının yoxa çıxdığını anlayan valideynlər dərhal çaya girərək axtarış aparıblar. Təxminən beş dəqiqə davam edən axtarışdan sonra Clara sudan çıxarılıb. Lakin azyaşlı uşaq artıq həyatını itirmiş olub.

Səlahiyyətli qurumlar açıqlayıb ki, əsasən uşağın boyun nahiyəsində olan ağır xəsarətlər pirana hücumu nəticəsində yaranıb.

Clara Vitoria’nın cansız bədəni məhkəmə-tibbi ekspertizası üçün Ədli Tibb İnstitutuna aparılıb. Faktla bağlı polis tərəfindən istintaqa başlanılıb.

Yerli medianın məlumatına görə, Braziliyada 2023-cü ildə ən azı 8 nəfər pirana hücumları nəticəsində yaralanıb və bu hücumlar zamanı qurbanların ciddi, qanlı xəsarətlər aldığı bildirilib. Son hadisə isə bölgədə piranaların yaratdığı təhlükənin nə qədər ciddi olduğunu bir daha göstərib.

Telegramda izləyin