Dəhşətli faciə: Mizraqla balıq tutmaq üçün suya girdi, bir də heç vaxt çıxmadı!

Türkiyənin Balıkəsir vilayətinin Erdek rayonunda mizraqla balıq ovlamaq üçün suya dalış edən təqaüddə olan hərbi prokuror Yalçın Karakaya həyatını itirib.

Sonxeber.az türk mediasına istinadən xəbər verir ki, hadisə saat 14:00 radələrində Balıkəsirin Erdek rayonuna bağlı kənd tipli Doğanlar məhəlləsi sahillərində baş verib.

Məlumata görə, mizraqla balıq ovlamaq məqsədilə dənizə girən 62 yaşlı Yalçın Karakayadan bir müddət sonra xəbər ala bilməyən ailə üzvləri vəziyyəti 112 Təcili Zəng Mərkəzinə bildiriblər.

Daxil olan məlumat əsasında hadisə yerinə axtarış-xilasetmə qrupları cəlb olunub. Dənizdə aparılan axtarışlar zamanı Yalçın Karakayanın cansız bədəni Doğanlar məhəlləsi açığında aşkarlanıb. Dənizdən çıxarılan mərhumun cənazəsi ölümün dəqiq səbəbinin müəyyən edilməsi üçün Bursa Məhkəmə-Tibbi Ekspertiza İnstitutuna göndərilib.

Təqaüddə olan hərbi prokuror olduğu bildirilən Yalçın Karakayanın son dövrlər Erdek rayonunun Doğanlar məhəlləsində yaşadığı qeyd edilib.

Faktla bağlı hüquq-mühafizə orqanları tərəfindən istintaq davam etdirilir.

Telegramda izləyin