200 min manatlıq dələduzluq ittihamı - 20 nəfərdən çox şikayətçi var

Bakıda böyük miqdarda dələduzluqda təqsirləndirilən Günel Abbasovanın (Pənah qızı) məhkəmə prosesi keçirilir.

Bu barədə AFN.az-a zərərçəkənlər məlumat veriblər. Bildirilir ki, G.Abbasova 20 nəfərdən çox vətəndaşa müxtəlif adlarla ümumilikdə 200 min manata yaxın pul "atıb". Qeyd edək ki, G.Abbasova haqqında Cinayət Məcəlləsinin 178.2.2 və 178.2.4 maddələri üzrə Qaradağ rayon Polis İdarəsində istintaq olunan cinayət işi Qaradağ rayon Prokurorluğu tərəfindən Qaradağ rayon məhkəməsinə göndərilib. Qaradağ rayon məhkəməsində qərara alınıb ki, sonuncu şikayət Xətai rayonu ərazisindən daxil olduğu üçün işə baxılması Xətai rayon məhkəməsinə həvalə edilsin. Xətai rayon məhkəməsində hakim Rəfail Sadıxovun sədrliyi ilə dekabrın 23-də hazırlıq iclası keçirilib, növbəti məhkəmə baxışı yanvarın 16-na təyin edilib.

Zərərçəkənlər bildirirlər ki, 20 nəfər G.Abbasovaya bu və digər işləri görmək üçün rəsmi formada pul verənlərdir, əslində isə onun əməllərindən zərər çəkənlərin sayı kifayət qədər çoxdur: "Günel Abbasova isə istər ibtidai istintaq dövründə, istərsə də məhkəmə istintaqı zamanı özünü kifayət qədər arxayın aparır, hər iclasa "bayıra çıxacam" havası ilə qatılır. İclaslarda hər kəsi susdurmağa, haqsız çıxarmağa çalışır, özünü günahkar saymır. Həbs edilməmişdən əvvəl müstəntiqlərə yalandan hamiləlik kağızı təqdim etmişdi. Üstəlik, məhkəmə proseslərində bizə hədə-qorxu gəlir ki, 3-4 il alacam, yatıb çıxacam, sizin pulunuz batacaq. Elə bilir ki, o qədər vəsaiti buna keçəcək məhkəmə, yaxud zərərçəkənlər".

Zərəçəkənlərdən Səfərov Sənan Əli oğlu bildirir ki, G.Abbasova onlardan qardaşı oğlu Səfərli Eyvaz Kənan oğlunu Azərbaycan Dövlət Xəzər Dəniz Gəmiçiliyinə işə düzəltək adı ilə 15 min manat alıb: "Biz onunla iş yoldaşım Abdullayev Əhəd vasitəsilə tanış olmuşuq. Bildirib ki, Prezident Administrasiyasında adamı var onun vasitəsilə işə düzəldir. İşə düzəltməyin rüsumunun 15 min manat olduğunu deyib. Pulu Günelin özünə məxsus karta atmışıq. Bir neçə ay yalan vədlərlə və bəhanələrlə bizi yola verdikdən sonra ortada yalan olduğunu bildik və polisə müraciət etməyə məcbur olduq. Qardaşım oğluna dedim getdi Gəncədə yazılı şəkildə şikayətini bildirdi. Günel bizi tanış edən adamlara da pul atıb, onlar mənə öz hesablarına 1000 manat qaytarıblar. Günel isə izahatında deyir ki, guya o qaytarıb. Yalan deyir. Pulumu alana qədər o qadından əl çəkməyəcəm. Mülki iddia da qaldırmışam. Xahiş edirəm, bu məsələ geniş ictimailəşsin, bütün Azərbaycan bilsin ki, bu qadın hansı səviyyədə insandır. Gah övladım ölüb dedi, gah atam ölüb dedi. Belə qadınların evdə uşaq böyütməsi yolverilməzdir".

İsayev Vüqar Hilal oğlu da zərərçəkmişlərdən biridir. G.Abbasova 2 min manatını alaraq ona pensiya düzəldəcəyini desə də, digər zərərçəkmişlər kimi onun da "işini düzəltməyib". O, dəyən zərərdən heç bir məbləğ geri almadığını deyir.

Hüseynova Mələk Raqib qızı G.Abbasovaya 11 min manat məbləğində pul verib. Öz növbəsində G.Abbasova onu məktəblərin birində müəllimə düzəltməyi öhdəsinə götürüb. Guya M.Hüseynovanı müəllimlərin işə qəbul imtahanından keçirib işlə təmin edəcəkmiş. Onun da işi düzəlməməklə yanaşı, dəymiş zərərin heç bir hissəsi geri qaytarılmayıb.

Yəhyayeva Səbinə Akif qızı G.Abbasovaya 8 min manat verib. Əvəzində Mingəçevir şəhərində "vakant yer açaraq" onu işə düzəldəcəkmiş.

Səfərova Raya Bulud G.Abbasovaya 44 min manat pul verib. Onun 32 min manatını ala bilsə də, 12 min manat hələ də qalır: "İki iş düzəltmək adı ilə alıb. "Sadəcə şirinlikdir, o işlər çox bahadır, mənim adamlarım yaxşı yerdədir deyə ucuz başa gəlir" deyirdi".

Eminova Gülnar İlham qızı isə həyat yoldaşının işə düzəldilməsi üçün G.Abbasovaya 15 min manat verib. Dəyən zərər geri ödənməyib: "Ötən ilin fevralında 7 saylı ASAN Xidmət mərkəzində vermişəm pulu. Müqavilə bağladıq, iki ay ərzində iş düzəlməsəydi pul geri qaytarılmalı idi. Bir qəpik belə qaytarmayıb, nə də işi düzəltməyib".

Ələkbərov Rasim G.Abbasovaya iş düzəltmək üçün 5500 manat verib. Lakin nə iş düzəlib, nə vəsaitdən geri qaytarılıb.

Şikayətçilər düşünürlər ki, G.Abbasovanın atası və bacısı da bu işdə onunla əlbirdirlər. Belə ki, zərərçəkənlərdən bəziləri pulu G.Abbasovanın atası Rüstəmov Pənahın kartına göndəriblər, Günelə guya iş düzəltmək üçün lazım olan sənədləri isə bacısı Günaya veriblər. Əliyeva Kəmalə Məzahir qızı bildirir ki, G.Abbasovanın atası və bacısı onun qonşuluğunda yaşayırlar: "Maddi vəziyyətləri yaxşıdır, görünür, Günelin insanları aldadıb aldığı pullardan onlar da "nəsiblərini" alıblar. Atası və bacısı "Qobu Park 3"-də obyekt işlədirlər. Həmin obyekt Günelin uşağının adına idi, o həbs edilən kimi obyektin adını dəyişdilər. Mən xəstə övladım ola-ola kreditə girdim 6500 manat kredit götürüb Günelin atasının kartına göndərdim, qohumuma əlillik düzəldəcəkdi guya. Lazım olan sənədləri də onun bacısına vermişəm. Amma düzəltmədi, aldatdı bizi".

Zərərçəkənlərin bir qismi də pulları G.Abbasovanın həyat yoldaşı Əlabbas Abbasovun kartına göndərdiklərini bildirirlər: "Həyat yoldaşı da, atası da, bacısı da işin əslini-astarını bilirlər, onunla əlbir ola bilərlər, biz bunu məhkəmədə də bildirmişik".

Şikayətçilər onu da bildirirlər ki, adları çəkilən şəxslərin heç biri nə istintaqa, nə də ki, indiyədək keçirilən məhkəmə proseslərinə çağırılmayıblar.

Qeyd edilənlərlə bağlı qarşı tərəfin mövqeyini verməyə hazırıq.

Telegramda izləyin