Hansı iş növü stres səviyyəsini daha çox artırır?

İnsanın öz işi ilə məşğul olması stresin yığılmasını sürətləndirir - bu cür çalışan şəxslərdə altı il ərzində stres səviyyəsi muzdlu işçilərlə müqayisədə 24% artıb.

Oxu.Az xəbər verir ki, bu qənaətə ABŞ-nin Notr-Dam Universitetinin alimləri gəliblər.

Tədqiqatın nəticələri "Journal of Business Venturing" (JBV) jurnalında dərc olunub.

Sağlamlıq vəziyyətində və stres səviyyəsində baş verən subyektiv və kimyəvi dəyişikliklər, o cümlədən kortizol səviyyəsi müqayisə edilib. Kortizol fiziki və ya emosional yüklənməyə cavab olaraq böyrəküstü vəzilərin qabıq qatında sintez olunan hormondur.

Nəticələr göstərib ki, özünüməşğulluğa keçən şəxslərdə stres səviyyəsi altı il ərzində orta hesabla 24% artıb. Bundan əlavə, "özünə işləyən" insanlarda gün ərzində ümumilikdə kortizol səviyyəsi daha yüksək olub. Alimlərin sözlərinə görə, bu, stres yaradan amillərin daha tez-tez təsir göstərdiyini göstərir.

Tədqiqatçılar vurğulayıblar ki, bu dəyişikliklərin səbəbləri arasında iş vaxtının uzanması, normallaşdırılmamış iş qrafiki və tapşırıqların yüksək dəyişkənliyi ola bilər.

Telegramda izləyin