Azərbaycan Cüdo Federasiyasının rəhbərliyi tərəfindən təzyiqə məruz qalan Tuncay Şamil prezidentə açıq məktub göndərib

Cüdo üzrə milli komandanın keçmiş üzvü, Azərbaycan Respublikası Cüdo Federasiyasının rəhbərliyi tərəfindən haqsız şəkildə milli komandadan uzaqlaşdırılan Şamil Tuncay Zəfər oğlu başına gətirilənlərlə bağlı ölkə başçısına açıq məktub ünvanlayıb.

Sonxeber.az həmin məktubu olduğu kimi təqdim edir:

Gənclərin dostu, Ali Baş Komandan, Möhtərəm Prezident cənab İlham Əliyev!

Sizin ölkənin idman sahəsinə göstərdiyiniz qayğı göz önündədir. Sayənizdə idmanın inkişafı Azərbaycanın dövlət siyasətinin əsas prioritetlərindən biri kimi müəyyən edilmiş, göstərdiyiniz diqqət və qayğı nəticəsində idmançılarımız beynəlxalq arenada yüksək nəticələr əldə etməkdədirlər. Bu yanaşmanın nəticəsi olaraq son illərdə Azərbaycanda idman sahəsində genişmiqyaslı və sistemli işlər görülmüşdür. Sizin təşəbbüsünüz və dəstəyiniz ilə ölkənin paytaxtında və regionlarında müasir idman infrastrukturu yaradılmış, onlarla Olimpiya İdman Kompleksi, stadionlar, idman zalları və digər idman obyektləri tikilərək istifadəyə verilmişdir. Bu obyektlər gənclərin idmana cəlb olunmasına, idmanın kütləviliyinin artırılmasına və peşəkar idmançıların yetişdirilməsinə böyük töhfə vermişdir.

Azərbaycan bir sıra nüfuzlu beynəlxalq yarışlara, o cümlədən Avropa və dünya səviyyəli çempionatlarda ev sahibliyi etmişdir. Bu tədbirlər Azərbaycanın dünyada idman ölkəsi kimi tanınmasına, beynəlxalq əlaqələrin möhkəmlənməsinə və turizmin inkişafına müsbət təsir göstərmişdir.

İdmançılarımızın mötəbər beynəlxalq yarışlarda mühüm nailiyyətlər qazandığı bir dövrdə Cüdo Federasiyasına təyin edilmiş bəzi vəzifəli şəxslər bu etimaddan sui-istifadə edərək mənə qarşı ədalətsiz qərar qəbul etmişlər.
Ölkəni beynəlxalq yarışlarda layiqincə təmsil etməyimə, 4 yaşından etibarən idmanla məşğul olmağıma baxmayaraq, heç bir təqsirim olmadan federasiyanın 17.11.2025-ci il tarixli qərarı ilə mən 10(on) il müddətinə Azərbaycan Milli Komandasından uzaqlaşdırılmışam və mənim yarışlarda, təlim və ya təlim -məşq toplanışlarında iştirakıma 10 il müddətinə qadağa qoyulmuşdur.

Bu ədalətsizliklə bağlı bir neçə dövlət qurumuna rəsmi şəkildə müraciət etməyimə baxmayaraq, müraciətlərim cavabsız qalmışdır. Federasiyanın verdiyi ədalətsiz qərar mənim idman sahəsindəki karyeramı həm ölkə ərazisində, həm də xarici ölkələrdə davam etdirməyimin qarşısını alır. Mənim nəinki ölkəmizdə, həmçinin ölkə xaricində karyeramı davam etdirməyimin qarşısını almaqda Azərbaycan Cüdo Federasiyasının rəhbərliyinin məqsədi nədir? Nəyə görə digər ölkələrdən təkliflər aldığım halda mən idman sahəsində karyeramı davam etdirə bilmirəm. Mənə qarşı belə qərəzin səbəbini nədir?

Ölkədə idmanın inkişafı dövlət səviyyəsində dəstəkləndiyi, idmançılar üçün bərabər, sağlam mühitin yaradıldığı, Azərbaycanın beynəlxalq yarışlara yüksək təşkilatçılıq səviyyəsi ilə ev sahibliyi etdiyi, və iştirakçı ölkələr tərəfindən müsbət qiymətləndirildiyi bir dövrdə bir Azərbaycan gəncinə edilmiş bu haqsızlıq təəssüf doğurur.

Sizdən xahiş edirəm ki, mənə qarşı qəbul edilmiş ədalətsiz qərarın ləğv edilməsinə və digər ölkəyə transfer olub orada karyeramı davam etməyimə köməklik göstərəsiniz.

Qeyd edək Tuncay Şamil Azərbaycan Cüdo Federasiyasının rəhbərliyinin ona qarşı qərəzli münasibəti ilə bağlı müvafiq dövlət qurumlarına da yenidən müraciət edəcəyini vurğulayıb.

Telegramda izləyin