Endirim tələləri və "son şans" oyunu: İstehlakçılar necə manipulyasiya olunur? - AÇIQLAMA

Müasir bazar münasibətləri şəraitində istehlakçıların seçim imkanları artsa da, aldadılma halları da azalmır. Endirim kampaniyaları, "son şans" mesajları, şişirdilmiş reklam vədələri və məhsul haqqında natamam məlumatlar alıcıların qərarına təsir göstərən əsas amillər sırasındadır. Bəzən istehlakçılar keyfiyyət, qiymət və ya zəmanət şərtləri ilə bağlı reallıqla üzləşəndə fərqli mənzərə ortaya çıxır. Bu baxımdan alıcıların ən çox hansı məqamlarda yanıldıldığı məsələsi aktuallığını qoruyur. Bəs, alıcılar daha çox hansı marketinq üsulları vasitəsilə aldadılır və istehlakçılar bu cür manipulyativ strategiyaları əvvəlcədən necə ayırd edə bilərlər?

Mövzu ilə bağlı Sonxeber.az-a Strateji kommunikasiya üzrə ekspert Səfər Aslanov danışıb.

O, açıqlamasında qeyd edib ki, müasir bazar münasibətləri şəraitində istehlakçıların seçim imkanları artsa da, düzgün məlumatlandırma ilə yanaşı, etik olmayan satış və kommunikasiya üsullarına da rast gəlinir:

"Marketinqin əsas məqsədi alıcını aldatmaq deyil, məhsul və xidmətlər barədə doğru, şəffaf məlumat verməkdir. Lakin bəzi hallarda endirim kampaniyaları, "son şans" mesajları, şişirdilmiş reklam vədləri və natamam məlumatlar istehlakçı qərarına qeyri-sağlam təsir göstərə bilir.
Nəticədə alıcı keyfiyyət, qiymət və ya zəmanət şərtləri ilə bağlı gözləntiləri ilə reallıq arasında fərqlə üzləşir. Bu baxımdan məsələ marketinqin özü deyil, onun etik prinsiplərə uyğun icra olunmamasıdır.
Manipulyasiyadan yayınmaq üçün istehkalçılar aşağıdakı qaydalardan istifadə edə bilərlər:
1. Qiyməti müqayisə edilməsi - Eyni məhsulu bir neçə platformada baxmaq lazımdır.
2. Brendin verdiyi ismarıc təcili qərar verməyə vadar edirsə daha təmkinli qərar vermək lazımdır.
3. Zəmanət, qaytarma şərtləri, əlavə ödənişlər və bütün xırda şriftləri oxumaq lazımdır.
4. Rəylərin keyfiyyətinə baxmaq lazımdır. Eyni üslubdadırsa və şübhəli nüanslar varsa qərar verməkdə tələsmək lazım deyil.
5. Alış qərarından öncə buna həqiqətən ehtiyyacınız varmı sualına rasional cavab verməyə çalışmalısınız".

Vüsalə İbrahimli

Telegramda izləyin