Azərbaycan Avropanın enerji təhlükəsizliyindəki rolunu artırır

Bu gün Azərbaycanın enerji istehsalı və tranziti potensialı onun dünyada söz sahibi olmasını təmin edir. Bakıda Cənub Qaz Dəhlizi Məşvərət Şurası çərçivəsində nazirlərin 12-ci iclası və Yaşıl Enerji Məşvərət Şurasının iclasına Azərbaycan və Avropa İttifaqı daxil olmaqla 27 ölkə, 11 beynəlxalq maliyyə institutu və təşkilat, eləcə də 49 enerji şirkəti qatılması onu deməyə əsas verir ki, Azərbaycan Avropanın enerji təhlükəsizliyindəki rolunu artırmaqla yanaşı, siyasi dəstək qazanıb.
Dünyada baş verən gərgin geosiyasi proseslər, müharibələr Avropada enerji böhranı yaradıb. Belə bir dövrdə Azərbaycanın Avropaya qaz ixracını artırmaq niyyəti rəsmi Bakının etibarlı tərəfdaş olmasını göstərir. Azərbaycan qazı Türkiyə üzərindən Avropaya ixrac edilir. İki dost və qardaş ölkənin həyata keçirdikləri layihələr Avropa üçün önəmlidir. Bu baxımdan hər iki dövlətin Avropadan siyasi dəstək və regionda təhlükəsizliyin təmin olunması üçün addımlar atmasını gözləməyə haqqı var. 2027-ci ildə Azərbaycan Avropaya qaz ixracını 20 milyard kubmetrə çatdırmağı planlaşdırıb. Bu çox böyük rəqəmdir və qitə üçün də mühüm əhəmiyyətə malikdir. Avropanın maliyyə institutları da Cənub Qaz Dəhlizinin genişləndirilməsi üçün sərmayəni artırmalı, interkonnektorların mühafizəsini gücləndirməlidir. Türkiyə istər Bakı-Tbilisi-Ərzurum, istərsə də Cənub Qaz Dəhlizinin Türkiyədən keçən hissəsinin təhlükəsizliyini təmin edir.
Ölkə başçısı tədbirdəki çıxışında bildirib: "Sonuncu dəfə bu auditoriya qarşısında çıxış edərkən bildirmişdim ki, biz 12 ölkəyə qaz tədarük edirik. Hazırda isə Azərbaycan qazının istehlakçısı olan ölkələrin sayı 16-ya çatıb. Bu göstərici üzrə Azərbaycan boru kəmərləri vasitəsilə qaz tədarük etdiyi ölkələrin sayına əsasən dünyada birinci yerdədir".
Yaxın gələcəkdə Mərkəzi Asiya Respublikalarının karbohidrogen ehtiyatlarının Azərbaycan və Türkiyə üzərindən Avropaya ixrac edilə biləcəyini deyən ekspert vurğulayıb ki, bunun üçün Avropa İttifaqı sərmayə yatıraraq infrastruktur layihələrin reallaşmasına nail olmalıdır.
Bakıdakı tədbirdə iştirak edən Avropa İttifaqının enerji və mənzil siyasəti üzrə komissarı Dan Yorgensen bildirib ki, Aİ-nın Rusiya qazından asılılığının davamlı şəkildə azaldıldığı dövrdə Azərbaycanla tərəfdaşlığın vacibliyi yalnız artacaqdır. Bu da öz növbəsində Avropanın enerji təhlükəsizliyinə və Azərbaycan iqtisadiyyatına fayda verəcək. O bildirib ki, Trans-Adriatik Boru Kəməri ilə kommersiya daşımaları başladığı dövrdə Azərbaycan 2024-cü ildə Avropa İttifaqının alıcılarından təbii qazın ixracına görə təxminən 24 milyard avro qazanıb.
Mövqeyini açıq şəkildə bəyan etməyi fürsət adlandıran komissar vurğulayıb: "Azərbaycanın qazı, qaz təchizatı Avropa İttifaqının enerji təhlükəsizliyinin mühüm sütunu olaraq qalacaq".

Cavid Fərhadov - ehtiyatda olan polkovnik-leytenant,
Vətən müharibəsi qazisi

Telegramda izləyin