Müharibə brifinqini eşidən senator kamera qarşısına keçdi - VİDEO

Richard Blumenthal ABŞ-nin İrana quru qoşunları göndərə biləcəyi ehtimalından narahatlığını ifadə edib.

Sonxeber.az xarici mediya istinadən xəbər verir ki, ABŞ-də İranla artan gərginlik Vaşinqtonda siyasi müzakirələri daha da qızışdırıb. Demokrat senator Riçard Blumental Konqres üzvləri üçün qapalı keçirilən təhlükəsizlik brifinqindən sonra açıqlama verərək, ABŞ-nin İrana quru qoşunları göndərə biləcəyi ssenarisinin getdikcə daha real göründüyünü bildirib.

Senator qeyd edib ki, təqdim olunan məlumatlardan sonra ABŞ hərbçilərinin birbaşa əməliyyatlara cəlb olunması ehtimalı ilə bağlı narahatlığı artıb. "Bu brifinqdən sonra quru qoşunlarını sahəyə sürmək məcburiyyətində qala biləcəyimiz və administrasiyanın məqsədlərinə çatmaq üçün ABŞ əsgərlərinin lazım ola biləcəyi barədə hər zamankından daha çox narahatam", - deyə Blumental vurğulayıb.

O, eyni zamanda administrasiyanın İrana dair strategiyasının aydın olmadığını da bildirib. Senatorun sözlərinə görə, Vaşinqtonun prioritetinin İranın nüvə potensialını aradan qaldırmaq, ballistik raket proqramını hədəf almaq, rejim dəyişikliyinə nail olmaq, yoxsa Tehranın regiondakı fəaliyyətini məhdudlaşdırmaq olduğu məsələsi hələ də qeyri-müəyyən olaraq qalır.

Blumental administrasiyanın təkcə Konqres üzvlərini deyil, Amerika ictimaiyyətini də proses barədə açıq şəkildə məlumatlandırmalı olduğunu deyib. "Administrasiya yalnız Konqres qarşısında deyil, Amerika xalqı qarşısında da məsuliyyət daşıyır. Bu məsələdə heç nə gizli qalmamalıdır. ABŞ vətəndaşları nələrin baş verdiyini bilməlidir", - senator əlavə edib.

İranla gərginliyin artması fonunda Vaşinqton administrasiyasının atacağı addımlar həm Konqresdə, həm də ictimaiyyətdə diqqətlə izlənilir. Xüsusilə quru qoşunlarının mümkün yerləşdirilməsi ehtimalı ABŞ-nin Yaxın Şərqdə yeni hərbi əməliyyata başlaya biləcəyi barədə müzakirələri yenidən gündəmə gətirib.

Telegramda izləyin