"İranın Naxçıvanı dron atəşinə tutması molla rejiminin riyakarlıq və nankorluq göstəricisidir" - DEPUTAT

"İranın Naxçıvanı dron atəşinə tutması molla rejiminin riyakarlıq və nankorluq göstəricisidir. Azərbaycan İranla qonşuluq münasibətlərinə yüksək hörmətlə yanaşaraq baş vermiş hadisələrə görə başsağlığı verib və səfirliyin qarşısında gül çələngi qoyub. Eyni zamanda, ölkəmiz Livandakı iranlıların təxliyəsini təşkil edir və humanitar yardımların göndərilməsini planlaşdırır. Amma İran namərdcəsinə mülki obyektlərimizi atəşə tutur. Azərbaycanı belə təxribatlarla qorxutmaq mümkün deyil. Ölkəmizin öz ərazisini müdafiə etmək üçün kifayət qədər gücü var".

Bu sözləri Sonxeber.az-a Milli Məclisin deputatı Azər Badamov danışıb.

O, açıqlamasında qeyd edib ki, İran isə ölkəmizə qarşı keçirdiyi təxribatlarla əsl niyyətlərini nümayiş etdirir:

" Azərbaycan baş vermiş təxribata görə İrandan izahat, üzr istənilməsini və təxribatda əli olanların cəzalandırılmasını tələb edir. Tehranda səfirliyimizə qarşı təşkil olunmuş təxribat da Azərbaycanı qorxutmaq məqsədi daşıyırdı. Lakin ölkəmizin prinsipial mövqeyi İranı müvafiq addımları atmağa məcbur etdi. İndi də Azərbaycan dövləti İrandan müvafiq addımların atılmasını tələb edir.

Azərbaycan İranda gedən müharibənin tərəfi deyil. Biz hətta ərazimizi başqa dövlətlərə İranda gedən müharibəyə dəstək üçün meydan olmasına imkan verməmişik. Amma İranın hərəkətləri qəbuledilməzdir, beynəlxalq normalara ziddir və bütün məsuliyyət onların üzərindədir".

Telegramda izləyin