"Naxçıvana ölüm yağdırmaq cəhdi Tehranın siyasi əxlaqdan kənar olduğunu sübuta yetirir" - DEPUTAT

"İran İslam Respublikası ərazisindən Azərbaycanın ayrılmaz parçası olan Naxçıvana qarşı həyata keçirilən dron hücumları regionda sülhə qarşı yönələn, terroru özündə ehtiva edən rəzillikdir. Bu hadisə beynəlxalq hüququn bütün norma və prinsiplərini ayaqlar altına atmaqdır. Baş vermiş cinayət aktına görə məsuliyyət tam şəkildə və qeyd-şərtsiz İran tərəfinin üzərinə düşür. Azərbaycan dövlətinin qüdrəti qarşısında aciz qalan molla rejiminin mülki infrastrukturu, hava limanını hədəf seçməsi onun qorxaqlığını və hərbi etikasının yoxluğunu bariz şəkildə nümayiş etdirir", - bu sözləri Sonxeber.az -a açıqlama verən deputat Günay Ağamalı deyib:

"Bu hücum həm də molla rejiminin dərinləşən riyakarlığını və nankorluğunu ifşa edir. Azərbaycan Prezidenti İlham Əliyevin İranın Ali Liderinin ölümü ilə bağlı dərhal başsağlığı verməsi, şəxsən səfirliyi ziyarət edərək, kədərini bölüşməsi və rəsmi Bakının çətin gündə qonşusuna humanitar yardım planlaşdırması sivil dövlətçilik nümunəsi idi. Lakin bu səmimiyyətin qarşılığında Naxçıvana ölüm yağdırmaq cəhdi Tehranın siyasi əxlaqdan kənar olduğunu sübuta yetirir. Belə bir xəyanətkar yanaşma, tarix boyu Azərbaycanın xoşməramlı qonşuluq siyasətinə sadiq qalmasına və öz ərazisindən İran üçün heç bir təhlükə yaranmasına imkan verməməsinə baxmayaraq atılmış murdar addımdır.

Molla rejimi milli kimliyimizə qənim kəsildiyini göstərir. İran daxilində soydaşlarımızı fundamental hüquqlardan məhrum edən, fəal soydaşlarımızı zindanlarda çürüdən və milli varlığımızı təzyiq altında saxlayan fars molla rejimi, indi də müstəqil Azərbaycanın suverenliyinə qəsd etməyə çalışır. İran unutmamalıdır ki, Azərbaycana diş qıcartmağa cəsarət edənlər tarix boyu hər zaman ağır məğlubiyyətlə üzləşərək peşman olublar. Bu qorxaq dron hücumu da eyni aqibəti paylaşacaq, bu xəyanətin müəllifləri öz layiqli cəzalarını alacaqlar.

Mövcud vəziyyətdə İran İslam Respublikası dərhal bu terror aktına aydınlıq gətirməli, beynəlxalq ictimaiyyət qarşısında izahat verməli və gələcəkdə bu kimi halların təkrarlanmayacağına dair təminat verən təxirəsalınmaz tədbirlər görməlidir.

Azərbaycan hər zaman səmimilik və dürüstlük prinsipinə sadiqdir və dar gündə qonşularının yanında olub, lakin bu humanist yanaşma kimlərdəsə arxayınlıq yaratmamalıdır.

Azərbaycan dövləti öz vətəndaşlarını və torpağını qorumaq, müvafiq cavab tədbirləri görmək iqtidarındadır. Azərbaycana uzanan əl qətiyyətlə qırılacaq. Bu hücum aktları cavabsız qalmayacaq və hər bir təxribatın bədəli İran tərəfi üçün olduqca ağır olacaq".

Telegramda izləyin