"Azərbaycan postmünaqişə dövründə bölgədə sülh gündəliyini irəli sürən əsas aktorlardan biridir" - ŞƏRH

Azərbaycan Respublikasının Prezidenti İlham Əliyevin Avropa İttifaqı Şurasının Prezidenti Antonio Koşta ilə təkbətək görüşü keçirilir.

Bəs görəsən bu görüşdən nələr gözlənilir?

Politoloq Tural İsmayılov bu barədə Sonxeber.az -a şərh verib:

"İlham Əliyev ilə Antonio Koşta arasında keçirilən təkbətək görüş Azərbaycan-Avropa İttifaqı münasibətlərinin indiki mərhələsində mühüm siyasi və diplomatik əhəmiyyət daşıyır. Bu görüş, ilk növbədə, Azərbaycanın Avropa ilə tərəfdaşlıq siyasətinin daha da dərinləşdirilməsi baxımından diqqət çəkir.

Görüşdən gözlənilən əsas məqamlardan biri enerji əməkdaşlığının genişləndirilməsi ilə bağlı müzakirələrdir. Azərbaycan artıq Avropanın enerji təhlükəsizliyində mühüm rol oynayan ölkələrdən biridir və Cənub Qaz Dəhlizi vasitəsilə Avropa bazarına etibarlı enerji təchizatını təmin edir. Bu baxımdan, tərəflər arasında enerji ixracının artırılması, yeni infrastruktur layihələri və uzunmüddətli tərəfdaşlıq mexanizmlərinin müzakirə olunması mümkündür.

Digər mühüm istiqamət regional təhlükəsizlik və Cənubi Qafqazda sabitlik məsələsidir. Azərbaycan postmünaqişə dövründə bölgədə sülh gündəliyini irəli sürən əsas aktorlardan biridir. Bu çərçivədə rəsmi Bakının Ermənistanla sülh sazişinin imzalanması istiqamətində mövqeyi və bölgədə davamlı sabitliyin təmin olunması ilə bağlı baxışları Avropa İttifaqı rəhbərliyi üçün də xüsusi maraq doğurur.

Eyni zamanda görüşdə nəqliyyat-logistika layihələri, xüsusilə Orta Dəhlizin inkişafı və Avropa ilə Asiyanı birləşdirən yeni iqtisadi marşrutların perspektivləri də diqqət mərkəzində ola bilər. Azərbaycan bu prosesdə regionun əsas tranzit qovşaqlarından biri kimi çıxış edir və Avropa üçün alternativ nəqliyyat xəttinin formalaşmasında mühüm rol oynayır.

Ümumilikdə, bu təkbətək görüş Azərbaycanın Avropa İttifaqı ilə münasibətlərində qarşılıqlı maraqlara əsaslanan praqmatik əməkdaşlığın davam etdiyini göstərir. Rəsmi Bakının müstəqil və balanslı xarici siyasəti fonunda Azərbaycan həm enerji təhlükəsizliyi, həm regional sabitlik, həm də iqtisadi əlaqələr baxımından Avropa üçün etibarlı tərəfdaş mövqeyini bir daha nümayiş etdirir".

Telegramda izləyin