"Bu gün Azərbaycan gəncliyi müstəqil və güclü dövlətin vətəndaşı kimi formalaşır" - DEPUTAT

Gənc nəslin milli mənlik şüurunun formalaşması və vətənpərvərlik ruhunda yetişməsi hər bir dövlətin gələcəyi üçün həlledici əhəmiyyət daşıyır. Bu məsələ bütövlükdə cəmiyyətin məsuliyyətidir".

Bu sözləri Sonxeber.az-a Milli Məclisin deputatı, Ana Vətən Partiyasının sədri Günay Ağamalı danışıb.

O, açıqlamasında qeyd edib ki, tariximizi, milli-mənəvi dəyərlərimizi, dövlətçilik ənənələrimizi gənclərə düzgün və ardıcıl şəkildə aşılamaq vacibdir:

"Bu istiqamətdə məktəbəqədər təhsil müəssisələrinin rolu xüsusi əhəmiyyət daşıyır. Uşaqlarda milli dəyərlərə bağlılıq və vətənə sevgi hissinin ilk təməli məhz erkən yaşlarda qoyulur. Məktəblərdə və ali təhsil müəssisələrində Azərbaycan tarixinin, milli qəhrəmanlarımızın və dövlətçilik irsimizin daha geniş formada tədrisi xüsusi əhəmiyyət kəsb edir. Gənclərin şəhid ailələri və qazilərlə görüşləri, Vətən müharibəsi ilə bağlı həqiqətlərin öyrənilməsi, tarixi məkanlara səfərlərin təşkili onların milli kimliyinin daha dərindən formalaşmasına xidmət edir. Bu cür tədbirlər gənclərdə Vətənə bağlılıq hissini gücləndirir və dövlətinə qarşı məsuliyyət duyğusunu artırır".

Eyni zamanda deputat onu da vurğuladı ki, gənclərin ictimai fəaliyyətə cəlb olunması, könüllülük hərəkatının genişləndirilməsi, mədəni və intellektual layihələrin həyata keçirilməsi də böyük əhəmiyyət daşıyır:

"Gənclər mütaliə edən, düşünən, müzakirə edən və cəmiyyət həyatında aktiv mövqe tutan fərd kimi formalaşmalıdır. Bu prosesdə ailə institutu və medianın rolu da xüsusi qeyd olunmalıdır.
Azərbaycanın müstəqilliyi və davamlı istiqrarı Ulu Öndər Heydər Əliyevlə başladığı üçün ölkəmizdə həyata keçirilən gənclər siyasəti də məhz onun adı ilə bağlıdır. Bu gün Azərbaycan gəncliyi müstəqil və güclü dövlətin vətəndaşı kimi formalaşır. Möhtərəm cənab Prezident İlham Əliyevin rəhbərliyi ilə həyata keçirilən dövlət gənclər siyasəti gənclərin milli ruhda tərbiyə olunmasına, onların potensialının üzə çıxarılmasına və dövlətimizin gələcəyinin etibarlı əllərdə olmasına xidmət edir. Əminəm ki, milli dəyərlərinə bağlı, vətənpərvər və savadlı Azərbaycan gəncliyi sabahını daha da güclü edəcək".

Vüsalə İbrahimli

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "Gənc nəslin milli mənlik şüurunun inkişaf etdirilməsi və vətənpərvərlik hisslərinin tərbiyəsi" mövzusuna uyğun olaraq dərc edilir.

Telegramda izləyin