Atanın damdan atdığı dəmir oğlunun başına düşüb, ölümünə səbəb oldu

Kütahya şəhərində baş verən bədbəxt hadisə bir ailəni yasa qərq edib.

Sonxeber.az türk mediasına istinadən xəbər verir ki, damda təmizlik işləri aparan atanın aşağı atdığı dəmir əlil oğlunun başına dəyib. Ağır yaralanan kişi xəstəxanada həyatını itirib.

Hadisə şəhərin Yenidoğan məhəlləsində, Şehit Şinasi Doğu küçəsində qeydə alınıb. Məlumata görə, Ahmet B. adlı şəxs üçmərtəbəli binanın damında təmizlik işləri apararkən aşağıya tikinti dəmiri atıb.

Atılan dəmir binanın qarşısında olan 44 yaşlı əlil oğlu Mustafa Bayraktarın başına dəyib. Ağır xəsarət alan Bayraktar hadisə yerinə çağırılan təcili tibbi yardım briqadası tərəfindən Kütahya Şehir xəstəxanasına aparılıb.

Həkimlərin bütün səylərinə baxmayaraq onun həyatını xilas etmək mümkün olmayıb və o xəstəxanada dünyasını dəyişib.

Hadisədən sonra ata Ahmet B. polis əməkdaşları tərəfindən saxlanılıb. Faktla bağlı araşdırmaların davam etdiyi bildirilir.

Telegramda izləyin