"Prezident İlham Əliyev çıxışında enerji təhlükəsizliyinin müasir dünyada artan rolunu xüsusi vurğuladı" - DEPUTAT

"Dünyada geosiyasi dəyişikliklərin sürətlə baş verdiyi bir dövrdə keçirilən XIII Qlobal Bakı Forumu beynəlxalq münasibətlərin gələcəyinə dair müzakirələrin aparıldığı mühüm platformalardan biridir".

Bunu Sonxeber.az-a Milli Məclisin deputatı Şahin Seyidzadə danışıb.

O, açıqlamasında qeyd edib ki, forumda çıxış edən Azərbaycan Prezidenti İlham Əliyev qlobal təhlükəsizlik məsələləri, regional sülh prosesi və Azərbaycanın strateji mövqeyi barədə geniş fikir mübadiləsi apardı:

"Prezident İlham Əliyev çıxışında bildirdi ki, müasir dünyada təhlükəsizlik məsələsi dövlətlərin əsas prioritetinə çevrilmişdir. Bir çox ölkələr illərlə qurduqları inkişaf modellərinin yeni geosiyasi risklər qarşısında sınaqdan keçdiyini görürlər. Beynəlxalq hüququn zəifləməsi və bəzi beynəlxalq təşkilatların qərarlarının icra olunmaması qlobal təhlükəsizlik sistemində ciddi boşluqlar yaradır. Azərbaycan uzun illər işğal və münaqişə şəraitində yaşamış ölkə kimi bu problemləri yaxından tanıyır. Prezident İlham Əliyev qeyd etdi ki, ölkənin ərazisinin təxminən 20 faizi 30 ilə yaxın müddətdə işğal altında olmuşdur. Bu dövrdə BMT Təhlükəsizlik Şurası tərəfindən qəbul edilmiş qətnamələr icra edilməmiş və münaqişənin həlli uzadılmışdır. 2020-ci ildə baş vermiş İkinci Qarabağ Müharibəsi nəticəsində Azərbaycan öz torpaqlarını azad etmiş və yeni regional reallıq formalaşdırmışdır. Prezident İlham Əliyev vurğuladı ki, Azərbaycan müharibə yolu ilə suverenliyini bərpa etdikdən sonra sülh gündəliyini irəli sürmüşdür. Azərbaycan və Ermənistan arasında əldə olunmuş sülh razılaşması regionda sabitlik üçün yeni imkanlar açmışdır. Sərhəddə atəşkəsin qorunması və qarşılıqlı etimadın formalaşması sülh prosesinin uğurlu davamına şərait yaradır. Azərbaycanın Ermənistana neft məhsulları ixrac etməsi və tranzit imkanlarını açması sülh siyasətinin praktiki nəticələrindən biridir. Prezident İlham Əliyev çıxışında enerji təhlükəsizliyinin müasir dünyada artan rolunu xüsusi vurğuladı. Azərbaycanın enerji resursları bir çox ölkələrin enerji təhlükəsizliyinə töhfə verir. Ölkə hazırda neft, qaz və elektrik enerjisinin ixracı ilə qlobal enerji bazarında mühüm mövqe tutur. Azərbaycan həm də mühüm logistika mərkəzinə çevrilmişdir. Ölkə Orta Dəhliz layihəsində əsas iştirakçılardan biridir və Avropa ilə Asiya arasında nəqliyyat əlaqələrinin genişlənməsinə töhfə verir. XIII Qlobal Bakı Forumu bir daha göstərdi ki, Bakı beynəlxalq dialoq və əməkdaşlıq üçün mühüm mərkəzə çevrilmişdir. Beləliklə, Prezident İlham Əliyevin çıxışı Azərbaycanın qlobal sülh və təhlükəsizlik məsələlərində fəal mövqeyini nümayiş etdirdi".

Telegramda izləyin