Avtobusda gərgin anlar: qalmaqallı ifadələr etiraz doğurdu - VİDEO

Türkiyənin İstanbul şəhərinin Tuzla rayonunda ictimai nəqliyyatda baş verən mübahisə qısa müddətdə geniş rezonans doğurub. İETT avtobusunda iki qadın sərnişin arasında başlayan gərginlik sonradan daha da kəskinləşərək mübahisəyə çevrilib.

Sonxeber.az türk mediasına istinadən xəbər verir ki, hadisənin avtobusun keçid hissəsində dayanaraq yolu bağlama məsələsi səbəbindən başladığı bildirilir. Gərginlik zamanı tərəflərin bir-birinə yüksək səslə reaksiya verdiyi müşahidə olunub.

Mübahisə zamanı qadınlardan birinin digərinə ünvanladığı ifadələr isə xüsusi diqqət çəkib. Görüntülərdə tərəflərdən birinin qarşı tərəfə "Sus, sənə xanımlığı öyrədəcəyəm. Başındakı yaylığı çıxart, ondan sonra bəlli olar" dediyi eşidilir.

Bu sözlərə etiraz edən digər sərnişin isə başındakı yaylığın mövzu ilə əlaqəsi olmadığını bildirərək, "Bunun başımdakı yaylıqla nə əlaqəsi var? Sürücü bəy, maşının nömrəsini verin" ifadələrini işlədib.

Baş verən anlar avtobusda olan şəxslər tərəfindən mobil telefonla qeydə alınıb. Sosial şəbəkələrdə yayılan görüntülər istifadəçilər arasında geniş müzakirələrə yol açıb və ictimai reaksiyaya səbəb olub.

Faktla bağlı araşdırma aparıldığı bildirilir.

Telegramda izləyin