Qəssabda ürəkbulandıran görüntülər! Hamısını insanlara satacaqdılar

Antalyada qida qalmaqalı: 55 kilo yararsız ət satışda aşkarlanıb, obyekt bağlanıb

Türkiyənin Antalya vilayətinin Serik rayonunda aparılan yoxlamalar zamanı ciddi qida təhlükəsizliyi pozuntusu üzə çıxıb.

Sonxeber.az türk mediasına istinadən xəbər verir ki, bir qəssab dükanında istehlaka yararsız 55 kiloqram ətin satışa çıxarıldığı müəyyən edilib.

Serik Bələdiyyəsinin Zabıta İdarəsinin əməkdaşları Cumhuriyet Mahallesi ərazisində həyata keçirdikləri planlı reydlər zamanı sözügedən faktı aşkarlayıb. Yoxlama zamanı obyekt daxilində kəskin qoxu və antisanitar şəraitin hökm sürdüyü qeyd olunub.

Araşdırma zamanı vitrindəki ətlərin böyük hissəsinin xarab olduğu və qoxmağa başladığı müəyyən edilib. Eyni zamanda, obyektin gigiyena qaydalarına ciddi şəkildə əməl etmədiyi və mövcud tələblərdən xeyli geri qaldığı bildirilib.

Serik Bələdiyyə başçısı Kadir Kumbulun göstərişi ilə obyekt möhürlənərək fəaliyyəti dayandırılıb. Sağlamlıq üçün təhlükəli olan məhsullar isə məhv edilməsi üçün götürülüb.

Rəsmi qurumlar rayon ərazisində qida təhlükəsizliyinin təmin olunması məqsədilə yoxlamaların davam etdiriləcəyini açıqlayıb. Bildirilib ki, vətəndaşların sağlamlığını riskə atan heç bir obyektə qarşı güzəşt edilməyəcək və qanunvericiliyə uyğun ciddi tədbirlər görüləcək.

Telegramda izləyin