Qurban ibadətinin mahiyyəti - İlahiyyatçı açıqlayır

Qurban bayramı hər il müsəlman dünyasında həm dini, həm də sosial baxımdan mühüm hadisə kimi qeyd olunur. Bu günlə bağlı ən çox müzakirə edilən məsələlərdən biri qurban ibadətinin müasir dövrdə necə anlaşılması və düzgün şəkildə icra olunmasıdır.

İlahiyyatçı Tural İrfan Qaynarinfo-ya açıqlamasında bu ibadətin mahiyyəti və yaranan suallara münasibət bildirib.

Onun sözlərinə görə, qurban kəsmək əvvəla dinin tərkib hissəsi olaraq ibadət hesab olunur:

"İnanclı insanların əqidəsinə uyğun olaraq bu ayin icra olunur. Qurban kəsməyin mənəvi, sosial yönləri cəmiyyət üçün faydalıdır. İldə bir dəfə ət yeməyən ailələr var ki, onların uşaqlarının dilinə ət yalnız Qurban bayramında dəyir. Kapitalizm sistemində evdə acından ölən şəxsi heç kəs axtarmır, maraqlanmır. Bu məsələlərə yalnız din həssas yanaşır. Eyni zamanda insanın öz malından, pulundan Allah yolunda keçə bilməsini test edir".

Tural İrfan deyir ki, insan fitrətdən qan tökməyə meylli olduğu üçün din bu daxili ehtiyacı nəzərə alaraq insan deyil, heyvan qanı tökməyi tövsiyə edir:

"Hazırda din təhrif olunduğu, əsasən İran, fars mədəniyyətinə qarışmış formada, xurafat və mövhumat şəklində yaşadıldığı üçün bu ibadətin də əsas mahiyyəti demək olar ki, itib. Sadəcə ənənə və yaxud "Cənnətdən huri qazanmaq üçün" yerinə yetirir çoxu. Amma əslində qurban cəmiyyət arasında mənəvi, sosial bağ yaratmalı, münasibətlərin daha da yaxınlaşmasını təmin etməlidir".

Həmsöhbətimiz deyir ki, İslama görə hətta qeyri-müsəlmanlara da qurban əti payı verilə bilər:

"Bu o deməkdir ki, sosial münasibətlər inkişaf etməlidir. Ancaq indi varlı, imkanlı adamlar guya qurban kəsir, özü kimi imkanlı dostlarını da başına yığıb kabab məclisi qurur. Bu, mədəni vəhşilikdir. Din ən həssas, ən zərif insani duyğuları, ehtiyacları nəzərə alaraq hökmlər verir. Lakin insanlar zamanla bu vacib elementləri xarab edirlər".

Son dövrlərin trendinə çevrilən qurban kəsimi və onun sosial şəbəkələrdə paylaşılmasına da toxunan ilahiyyatçı bildirib ki, burada iki məqama diqqət etmək lazımdır:

"Sosial şəbəkələrdə qurban kəsimini, paylanılmasını nümayiş etdirmək əgər başqalarını təşviq, təbliğat və qurban ibadətinin faydalarını göstərmək məqsədi daşıyırsa, burada qəbahət yoxdur. Yox, əgər riyakarlıq, özünü reklam xarakterlidirsə, bu əməl günahdır".

"Qurban kəsmək maddi imkanı normal olanlara vacibdir. İmkanı olmayan, borcu, krediti olan şəxslər azaddır. Əgər şəxs krediti öz maddi ehtiyaclarına görə götürübsə onun qurban kəsməsi məqbul deyil. Lakin imkanı olduğu halda, ticarətini, maddi imkanını daha da genişləndirmək üçün kredit götürübsə həmin şəxslər qurban kəsməlidir. Qurbanın ətini satmaq da almaq da haramdır. Çünki ibadətin mahiyyəti zədələnir, təhrifə uğrayır. Qurban ətini satan qardaşını öldürüb ətini satan kimidir. Qurban ətini satmaq kimi ənənələr təəssüf ki, ölkəmizə kənardan keçir. Kimin imkanı varsa kəssin, imkanı olmayan da adi formada ət alıb bişirə bilər. Lakin bəziləri həmin gün fürsətdən istifadə edərək kəsdikləri heyvanları qurban əti adı ilə satırlar. Bu, çox ağır bəlalara gətirib çıxara biləcək şeytani bir ənənədir. Bu adətin yayılmasına imkan vermək olmaz" - deyə Tural İrfan əlavə edib.

Telegramda izləyin