Professor xərçəng riskini artıran amilləri açıqladı

"Ekoloji çirklənmə artır, qida məhsullarının keyfiyyəti aşağı düşür, insanlar isə getdikcə daha az hərəkət edir. Belə bir şəraitdə xərçəng xəstəliklərinin yayılmasının artması təəccüblü deyil".

Bunu Qaynarinfo-ya açıqlamasında onkoloq-cərrah, professor Adil Qeybulla deyib.

Həkim bildirib ki, xərçəng yoluxucu xəstəlik deyil və orqanizmdə müxtəlif səbəblərin təsiri nəticəsində yaranaraq inkişaf edir:

"Bu, orqanizmdə formalaşan və müxtəlif səbəblərdən nəzarətdən çıxan patoloji prosesdir. Xəstəlik orqanizmin resursları hesabına inkişaf edir və sürətlə çoxala bilir. Məhz buna görə də ağır gedişata səbəb olur, zamanla orqanizmi zəiflədərək ciddi fəsadlar yaradır".

Professorun sözlərinə görə, insanların gündəlik qəbul etdiyi su, hava və qida məhsulları da xəstəliyin yaranması və inkişafında mühüm rol oynayır:

"Bu amillərin bir çoxunda xərçəng riskini artıran maddələr mövcuddur. Ticarət şəbəkələrində müxtəlif rəngləndiricilər və əlavələrlə zəngin içkilər, energetik və alkoqollu məhsullar, eləcə də keyfiyyəti şübhə doğuran qidalar geniş yayılıb. Təəssüf ki, insanlar bu məhsullara daha çox meyl göstərirlər. Elələri var ki, gün ərzində əsasən trans yağlarda hazırlanmış qəlyanaltılar və çipslərlə qidalanırlar. Digər tərəfdən, həddindən artıq qidalanıb az hərəkət edən insanlar da az deyil. Bütün bunlar orqanizmdə sərbəst radikalların artmasına və müxtəlif xəstəliklərin, o cümlədən xərçəngin inkişaf riskinin yüksəlməsinə səbəb olur".

Telegramda izləyin