"Yay tətili uşağın özünü kəşf etməsi üçün ən yaxşı fürsətdir" - AÇIQLAMA

"Yay tətili uşaqların həm fiziki, həm də psixoloji baxımdan tam bərpası üçün zəruri olduğu qədər, zehni çevikliyini qoruması baxımından da əhəmiyyətlidir. Valideynlər yay dövründə məcburi tədris rejimindən uzaq duraraq inkişaf prosesini daha təbii şəkildə təşkil etməlidirlər. Ən səmərəli yanaşma uşağın gündəlik fəaliyyətini tamamilə dayandırmaq deyil, onu yeni mühitə və maraq dairəsinə uyğun məşğuliyyətlərlə zənginləşdirməkdir".

Bu sözləri Sonxeber.az-a təhsil eksperti Şəmsi Qoca danışıb.

O, açıqlamasında qeyd edib ki, bədii kitab oxumaq, təbiəti müşahidə edərək kiçik araşdırmalar aparmaq və ya əl işləri ilə məşğul olmaq uşağın zehni fəallığını qoruyub saxlayır:

"Eyni zamanda, yuxu və istirahət rejiminə nəzarət edilməli, tədris ilinin başlanmasına yaxın isə bu rejim tədricən məktəb qrafikinə uyğunlaşdırılmalıdır. Valideyn üçün ən vacib addım uşağın üzərindəki akademik təzyiqi aradan qaldırmaq, onu özünü kəşf etməyə və yeni bacarıqlar qazanmağa həvəsləndirməkdir. Sonda isə ailə daxilində qurulan sağlam emosional ünsiyyət, birgə gəzintilər və müxtəlif fəaliyyətlər uşağın yeni dərs ilinə motivasiyalı və hazırlıqlı başlamasının əsas təminatçısıdır".

Vüsalə İbrahimli

Telegramda izləyin