Məktəblərdə psixoloq problemi: Bir mütəxəssis yüzlərlə şagirdə necə çatdırsın? - TƏHSİL EKSPERTİNDƏN AÇIQLAMA

Məktəblərdə şagirdlərin yalnız akademik biliklərinin deyil, psixoloji vəziyyətlərinin də diqqətdə saxlanılması vacib məsələlərdən biridir. Lakin təhsil müəssisələrində məktəb psixoloqlarının sayının yetərli olmaması bu istiqamətdə ciddi suallar yaradır. Bir sıra məktəblərdə psixoloqların üzərinə düşən iş yükünün çoxluğu, şagirdlərin fərdi şəkildə psixoloji dəstək almasını çətinləşdirə bilər.

Xüsusilə yeniyetmələr arasında aqressiya, davranış pozuntuları, bullinq, ailədaxili problemlər və emosional gərginlik kimi halların mövcudluğu məktəb psixoloqlarının fəaliyyətinin əhəmiyyətini daha da artırır. Bəs məktəblərdə psixoloq çatışmazlığı hansı problemlərə yol açır? Hər məktəbdə psixoloq ştatının artırılmasına ehtiyac varmı?

Mövzu ilə bağlı təhsil eksperti Anar Hüseynov Sonxeber.az-a açıqlamasında bildirdi ki, məktəblərdə psixoloqların sayının az olması ciddi problemdir. Bəzi təhsil müəssisələrində bir psixoloqun yüzlərlə, hətta minlərlə şagirdlə işləməsi tələb olunur. Belə olan halda həmin mütəxəssisin hər bir şagirdlə fərdi məşğul olması, onların psixoloji vəziyyətini mütəmadi izləməsi mümkün deyil. Psixoloqun işi formal xarakter daşımamalı, real nəticəyə hesablanmalıdır. Bu gün məktəblərdə bullinq, şagirdlər arasında aqressiya, müəllim-şagird münasibətlərində gərginlik və yeniyetmələrin psixoloji problemləri kimi məsələlər mövcuddur.

Bu problemlərin qarşısının alınmasında məktəb psixoloqlarının rolu böyükdür. Hesab edirəm ki, məktəblərdə şagird sayına uyğun psixoloq ştatları müəyyənləşdirilməli, zərurət olan təhsil müəssisələrində əlavə mütəxəssislər işə cəlb edilməlidir".

Müəllif: İlkin Məmmədkərimov

Telegramda izləyin