Bəzi insanlarda empatiya hissinin olmamasının əsas psixoloji səbəbləri nələrdir? - AÇIQLAMA

Empatiya hissi insanların bir-birinin duyğu və düşüncələrini anlamaq, sağlam münasibətlər qurmaq və sosial harmoniyanı qorumaq baxımından mühüm rol oynayır. Lakin bəzi insanlarda bu hissin zəif olduğu, hətta bəzən tamamilə müşahidə edilmədiyi görünür. Bunun səbəblərinin nədən qaynaqlandığı və sonradan inkişaf etdirilib-etdirilə bilməməsi maraq doğuran məsələlərdəndir.

Bəzi insanlarda empatiya hissinin zəif və ya demək olar ki, tamamilə olmamasının əsas psixoloji səbəbləri nələrdir?

Bu xüsusiyyət sonradan formalaşdırıla və ya gücləndirilə bilərmi?

Mövzu ilə bağlı psixoloq Samirə Bağırova Sonxeber.az -a açıqlama verib:

"Empatiya yalnız "başqasının nə hiss etdiyini anlamaq" deyil, həm də həmin hissi daxildə müəyyən qədər yaşaya bilmək bacarığıdır. Bu hissin zəif olması bəzən erkən uşaqlıq dövründə uşağın emosional ehtiyaclarının qarşılanmaması, travmatik təcrübələr, sərt və ya sevgidən uzaq, yaxud soyuq davranışlı ana, ailə mühiti ilə bağlı ola bilər. İnsan əvvəlcə özü ilə səmimi olmağı, öz duyğularını tanımalıdır və özünü qəbul etmədən başqasının duyğularına da açıq ola bilmir. Amma bəzən uzunmüddətli stress, emosional tükənmə və ya depressiv vəziyyətlər də insanın emosional həssaslığını azalda bilər. Eləcə də, narsistik meyillər,antisosial davranış, və ya həddindən artıq özünüqoruma mexanizmləri insanın diqqətini daha çox özünə yönəldir və qarşı tərəfin hisslərini görməsini çətinləşdirə bilir. Vacib məqam budur ki, empatiya tamamilə sabit və dəyişməz xüsusiyyət deyil. Psixologiyada bu bacarıq sonradan inkişaf etdirilə bilər. Bunun üçün əvvəlcə insanın öz emosiyalarını tanıması, aktiv şəkildə qarşı tərəfi dinləməyi, fərqli baxış bucaqlarını anlamağa çalışması kimi terapiyalarla seanslarda öyrədilir".

Vüsalə İbrahimli

Telegramda izləyin