"Nə vaxta kimi ailənin bütün yükü qadınların üzərinə düşəcək, o vaxta qədər boşanmaların sayı çoxalacaq" - SOSİOLOQ

"Nə vaxta qədər ailənin bütün yükü qadınlara yüklənəcək o vaxta qədər boşanmaların sayı artmaqda davam edəcəkdir".

Bunu Sonxeber.az-a danışan sosioloq Nəzrin Əhmədzadə bildirib.

Sosioloq qeyd edib ki, ailələrdə namuslu olmaq qadınlardan tələb olunur:

"Bu gün ailədə bütün nəslin namusu o ailədə böyüdülən qıza yüklənir. Oğlana isə o kişidi, nəyləsə də ona heç kim nəsə deyen deyil prizmasından yanaşırlar. Niyə bu gün kişilər etdikləri səhvə görə deyil məhz qadınlar mühakimə olunur. Bunun səhvi də yenə də qadınlardır. Çünki bəzi anlar oğlanların sən neyləsən olar psixologiyası ilə böyüdürlər. Nəticədə də onlar ailə quranda məsuliyyətlərini dərk etmir, hətta mən kişiyəm mənə olar prizmasından yanaşaraq hətta həyat yoldaşlarına xəyanət də edirlər. Qadın da xəyanət etdiyi üçün həyat yoldaşından boşanmaq istəyəndə də hər kəs kişini müdafiə edir, hətta onun başqa qadınla münasibətdə olmasını ayrılma səbəbi kimi görmürlər. Amma o xəyanəti qadın etsə ona əxlaqsız damğası vurub, hətta qətlə də yetirirlər. Hələ bizim cəmiyyət anlamır ki, xəyanət edən tək qadın əxlaqsız deyil, kişi də əxlaqsızdır və o xəyanəti tək xanımına yox ailəsinə, övladlarına etmiş olur".

Sosioloq vurğulayıb ki, bu gün bəzi kişilər var ki, anasının icazəsi olmadan həyat yoldaşına və uşaqlarına heç nə almır və yaxud da nəyisə barədə qərar verə bilmirlər:

"Təsəvvür elə sən həyat yoldaşınla gəzməyə getmək istəyirsən qaynana icazə vermədiyi üçün gedə bilmirsən. Hətta uşaq dünyaya gətirib-gətirməməyinə qaynana icazə verməlidir. Bu cür ailə olar? Əlbəttə ki, böyüklərə hörmət edilməli və məsləhət alınmalıdır. Amma kişi ailə qurursa məsuliyyətini dərk etməlidir. Mən kişiyəm mənə hər şey olar deyib, həyat yoldaşına və övladlarına hörmətsizlik etməməlidir. Ən önəmlisi isə qurduğu ailəsinin namusunu tək qadından deyil, özünün qorumalı olduğunu dərk etməlidir. Mən qadınlardan, xüsusilə də analardan xahiş edirəm ki, oğlanlarınızı şəxsiyyət kimi böyüdün, onlara qadınlara dəyər verməyi öyrədin. Daha sən kişisən sənə hər şey olar düşüncəsi ilə yox".

"Bu gün bütün kişilər düşünür ki, pul qazanırsa üzərinə düşən öhdəlikləri yerinə yetirmiş olur. Hətta bəziləri sən neyleyirsən guya bütün günü evdə, yeyib yatırsan deyə alçaldan da var. Daha düşünmürlər ki, onlar əgər təkcə pul qazanırlarsa, qadınlar evin təmizliyindən, həyat yoldaşının və uşaqların təmiz geyimindən, yeməyindən və övladlarının düzgün tərbiyəsindən birbaşa cavabdehdir. Gəlin araşdıraq görək neçə faiz kişi uşaqların tərbiyəsində və ev işlərində həyat yoldaşlarına kömək edir. Hamısı deyəcək ki, mən kişiyəm, ev işlərini qadın görməlidir. Gülməli olan bilirsiniz nədir?Qadın işləyib maddi cəhətdən həyat yoldaşına kömək etməsi ayıb hesab olunmur, kişinin ev işi görməsi ayıb hesab edilir. Biz boşanmaların qarşısını almaq üçün ilk olaraq kişi və qadına olan yanaşma tərzini dəyişməliyik. Ən önəmlisi isə qızlarımızı kişilərin qulu kimi yox, şəxsiyyət kimi, güclü öz ayaqları üzərində durmağı bacaran savadlı qadin kimi böyütməliyik. Uşaqlıqdan onlara cehiz yığmaq yerinə, qızlarımızın savadlı və güclü böyüməkləri üçün çalışmalıyıq", - deyə sosioloq qeyd edib.

Telegramda izləyin