"2026-cı ilin sonunadək ümumilikdə 34 500 ailənin Qarabağ və Şərqi Zəngəzura qayıdışı planlaşdırılır" - DEPUTAT

"Uzun illər dağıntılara və vandalizmə məruz qalmış Qarabağ və Şərqi Zəngəzurda bu gün həyat yenidən qurulur. Dövlət tərəfindən həyata keçirilən sistemli və mərhələli layihələr nəticəsində regionda bərpa və quruculuq işləri paralel şəkildə icra olunur, sosial və iqtisadi infrastruktur yenidən formalaşdırılır".

Bunu Sonxeber.az-a danışan deputat Aydın Mirzəzadə bildirib.

Deputat qeyd edib ki, hazırda işğaldan azad edilmiş ərazilərə Böyük Qayıdış proqramı çərçivəsində köç prosesi mərhələli şəkildə davam etdirilir!

"Dövlət tərəfindən yaşayış məntəqələrinin bərpası, yeni evlərin, məktəblərin, xəstəxanaların, yolların və digər infrastrukturun tikintisi həyata keçirilir. Məqsəd keçmiş məcburi köçkünlərin təhlükəsiz və davamlı şəkildə öz doğma yurdlarına qayıtmasını təmin etməkdir.Son aylarda müxtəlif yaşayış məntəqələrinə növbəti köç karvanları göndərilib və yeni ailələrin məskunlaşdırılması davam edir.2026-cı ilin iyul ayına olan məlumata görə, Böyük Qayıdış proqramı çərçivəsində işğaldan azad edilmiş ərazilərə təxminən 6 000-dən çox ailə köçürülüb. Bu, 24 mindən çox insanın doğma yurdlarına qayıtması deməkdir. Köç prosesi mərhələli şəkildə davam edir və yeni yaşayış məntəqələri istifadəyə verildikcə ailələrin sayı artır. Dövlət Proqramına əsasən isə 2026-cı ilin sonunadək ümumilikdə 34 500 ailənin (təxminən 140 min nəfərin) Qarabağ və Şərqi Zəngəzura qayıdışı planlaşdırılır".

Deputat vurğulayıb ki, 2026-cı ilin sonuna qədər Şərqi Zəngəzur və Qarabağ iqtisadi rayonlarında 100-dən çox yaşayış məntəqəsinin yenidən qurulması və bərpası başa çatacaqdır:

"Təbii ki, keçmiş məcburi köçkünlərin qayıtdığı hər bir yaşayış məntəqəsi bütün infrastrukturla təmin edilir və 30 il əziyyətli köçkün həyatı yaşamış insanların firavan həyatlarına davam etdirilməsi üçün dövlətimiz tərəfindən bütün şərait yaradılır. Bu gün uğurla həyata keçirilən Böyük Qayıdış strategiyası yeni infrastrukturun yaradılması ilə yanaşı, işğaldan azad olunmuş əraziləri ümumən regionun yeni inkişaf modelinə çevirməkdən ibarətdir. İllər boyu vətən həsrəti ilə yaşayan soydaşlarımızın, onların övladlarının öz doğma yurduna dönməsi, burada həyata davam etməsi, qurub-yaratması onlar üçün əvəzedilməz hissdir ".

Telegramda izləyin