Yüzlərlə vətəndaşı aldadan mebel mağazası sahibi yoxa çıxıb - VİDEO

Türkiyənin Aydın vilayətində fəaliyyət göstərən mebel mağazasının sahibinin yüzlərlə müştərini aldadaraq topladığı pullarla yoxa çıxdığı iddia olunur. Hadisə nəticəsində təxminən 500 nəfərin zərərçəkən olduğu bildirilir.

Sonxeber.az xarici mediaya istinadla xəbər verir ki, sifariş etdikləri mebellərin təhvil veriləcəyini gözləyən vətəndaşlar mağazanın bağlandığını və tamamilə boşaldıldığını gördükdən sonra aldadıldıqlarını anlayıblar. Hadisə şəhərdə böyük rezonans doğurub.

Zərərçəkənlər arasında yaxın vaxtlarda toy etməyə hazırlaşan bir gəncin yaşadığı sarsıntı isə diqqət çəkib. Mağazanın qarşısına gələn gənc bütün yığımlarını mebel sifarişinə xərclədiyini bildirərək göz yaşlarını saxlaya bilməyib.

"Bir aydan sonra toyum olacaqdı. Evlənməyə hazırlaşırdım. Hər şeyin pulunu son qəpiyinə qədər ödəmişdik. İndi mağaza bomboşdur, heç kim yoxdur. Mən indi nə edim?" - deyə o bildirib.

Hadisə yerinə toplaşan digər zərərçəkənlər də narazılıqlarını ifadə edərək hüquq-mühafizə orqanlarına şikayət etdiklərini söyləyiblər.

Məlumata görə, yüzlərlə şəxsin müraciəti əsasında polis genişmiqyaslı araşdırmaya başlayıb. Hüquq-mühafizə orqanları çoxsaylı vətəndaşı zərərə saldığı iddia edilən mebel mağazasının sahibinin saxlanılması istiqamətində əməliyyat-axtarış tədbirlərini davam etdirir.

Telegramda izləyin