"Peter Pelleqrininin ölkəmizə səfəri Qarabağın bərpası istiqamətində tərəfdaşlığın genişləndirilməsinə xidmət edəcək" - DEPUTAT

"Azərbaycan ilə Slovakiya Respublikası arasında münasibətlər dostluq, qarşılıqlı hörmət və əməkdaşlıq prinsiplərinə əsaslanır. Son illərdə bu əlaqələr daha da genişlənərək strateji tərəfdaşlıq istiqamətində inkişaf edir".

Bunu Sonxeber.az-a danışan deputat Nəsib Məhəməliyev bildirib.

Deputat qeyd edib ki, Slovakiya ilə Azərbaycan arasında diplomatik münasibətlər 1990-cı illərin əvvəllərindən bəri davamlı və sistemli şəkildə inkişaf edir:

"Slovakiya Azərbaycanın müstəqilliyini 1992-ci ilin yanvarında tanıyıb və iki ölkə arasında diplomatik münasibətlər rəsmi olaraq 1993-cü ildə qurulub.Ötən müddət ərzində iki ölkə arasındakı diplomatik əlaqələr möhkəmlənib və strateji əməkdaşlıq üçün də əlverişli zəmin yaranıb

Slovakiya ilə Azərbaycan arasında əsas əməkdaşlıq istiqamətləri bunlardır:

Siyasi əlaqələr: İki ölkə arasında yüksək səviyyəli qarşılıqlı səfərlər və siyasi dialoq mütəmadi davam edir. Prezidentlər, parlament rəhbərləri və hökumət nümayəndələrinin görüşləri münasibətlərin inkişafına töhfə verir.

Enerji sahəsi: Slovakiya Azərbaycanın Avropanın enerji təhlükəsizliyində rolunu yüksək qiymətləndirir. Tərəflər təbii qaz və yaşıl enerji sahəsində əməkdaşlığı genişləndirirlər.

İqtisadi əməkdaşlıq: Ticarət, investisiya, nəqliyyat, sənaye və müdafiə sənayesi sahələrində əməkdaşlıq imkanları artırılır.

Humanitar və təhsil əlaqələri: Təhsil, mədəniyyət və turizm sahələrində qarşılıqlı layihələr və mübadilə proqramları həyata keçirilir.

Parlamentlərarası əməkdaşlıq: Hər iki ölkənin parlamentlərində dostluq qrupları fəaliyyət göstərir və qanunverici orqanlar arasında müntəzəm təmaslar saxlanılır.

Slovakiya Prezidenti Peter Pelleqrini Şuşaya rəsmi səfəri Azərbaycan ilə Slovakiya Respublikası arasında münasibətlərini daha möhkəmləndirilməsi üçün əhəmiyyətlidir".

Deputat vurğulayıb ki, səfər çərçivəsində Peter Pelleqrini ilə Azərbaycan Prezidenti İlham Əliyevlə təkbətək və geniş tərkibdə görüşləri keçirilib:

Görüşlərdə Azərbaycan-Slovakiya siyasi və iqtisadi əməkdaşlığının inkişafı müzakirə olunub. Xüsusilə də Qarabağın bərpası və Slovakiya şirkətlərinin bu prosesdə iştirakı diqqət mərkəzində olub. Görüşdə enerji və regional əməkdaşlıq məsələləri də müzakirə olunub. Slovakiya Respublikasının Prezidenti Peter Pelleqrinin Azərbaycana rəsmi səfəri iki ölkə arasındakı münasibətlərin strateji səviyyəyə qalxmasının, regionlararası nəqliyyat-energetika yönümlü əməkdaşlığın və müdafiə sənayesi sahəsində yeni mexanizmlərin formalaşmasının işarəsidir. Peter Pelleqrini Şuşada aparılan bərpa və yenidənqurma işləri ilə tanış olub və Slovakiyanın bu prosesə dəstəyini ifadə edib. Səfər proqramının ən mühüm hissələrindən biri Ağdamın Baş Qərvənd kəndinə səfər olub. Prezidentlər kənddə görülən işlərlə, xüsusilə də Slovakiyanın iştirakı ilə bərpa olunan və dostluq simvolu olacaq məktəb binasının layihəsi ilə tanış olublar.Peter Pelleqrini Azərbaycanı regionun sabitliyinin qarantı və əsas oyunçusu adlandırıb. Slovakiya Prezidenti slovak şirkətlərinin Azərbaycanın iqtisadiyyatına və regionun inkişafına töhfə verəcəyinə ümid etdiyini vurğulayıb.

Peter Pelleqrinin ölkəmizə rəsmi səfəri dost ölkələr arasında əməkdaşlıq əlaqələrinin genişlənməsi ilə bərabər həm də diplomatiya, iqtisadi investisiyalar, sənaye əməkdaşlığı və parlament dialoqları strateji tərəfdaşlığın mühüm komponentləri olaraq bu əlaqələrin gələcəkdə daha da möhkəmlənəcəyinin göstəricisidir. Xüsusilə bu səfər Qarabağın bərpası istiqamətində tərəfdaşlığın genişləndirilməsinə xidmət edəcək".

Telegramda izləyin