"Slovakiya Azərbaycanın ən etibarlı tərəfdaşlarından biridir" - Deputat

"İyulun 14-də Slovakiya Respublikasının Prezidenti Peter Pelleqrinin Azərbaycana səfəri çərçivəsində Şuşada keçirilən görüş və verilən bəyanatlar iki ölkə arasında mövcud olan dostluq münasibətlərinin, siyasi dialoqun və həmçinin əməkdaşlığın yüksək səviyyədə inkişaf etdiyini bir daha təsdiq etdi".

Bunu Sonxeber.az-a danışan deputat Aydın Hüseynov bildirib.

Deputat qeyd edib ki, Prezident İlham Əliyevin Slovakiya-Azərbaycan siyasi əlaqələri çox yüksək səviyyədədir və qarşılıqlı səfərlər bunu əyani şəkildə göstərir fikri iki ölkə arasında formalaşmış etibarlı tərəfdaşlığın və qarşılıqlı hörmətə əsaslanan münasibətlərin mahiyyətini dolğun şəkildə ifadə etməsi üçün kifayətdir:

"2024-cü ildə Azərbaycan və Slovakiya arasında Strateji Tərəfdaşlığın Qurulmasına dair Birgə Bəyannamənin imzalanması münasibətlər tarixində mühüm dönüş nöqtəsi olub.Slovakiya Azərbaycanın etibarlı tərəfdaşlarından biridir. Son illərdə dövlət başçıları, hökumət nümayəndələri və parlamentlərarası nümayəndə heyətləri arasında intensiv təmaslar, rəsmi səfərlər, verilən bəyanatlar iki ölkə arasında siyasi əlaqələri və dostluq münasibətlərini daha da möhkəmləndirib. İki ölkə liderlərinin, eləcə də yüksək vəzifəli dövlət nümayəndələrinin qarşılıqlı səfərləri diplomatik münasibətlərlə yanaşı həm də iqtisadi, enerji, humanitar və mədəni əməkdaşlığın inkişafına mühüm töhfə verir".

Deputat vurğulayıb ki, bu gün Şuşa beynəlxalq tədbirlərin və yüksək səviyyəli görüşlərin keçirildiyi nüfuzlu məkana çevrilib:

"Slovakiya Prezidentinin Şuşaya səfəri Azərbaycanın ərazi bütövlüyünə və suverenliyinə verdiyi yüksək dəyərin göstəricisidir. Slovakiya şirkətlərinin Azərbaycanın işğaldan azad edilmiş ərazilərində həyata keçirilən bərpa və yenidənqurma işlərində, xüsusilə Ağdam rayonunun Baş Qərvənd kəndinin tikintisində iştirakının önəmi ölkəmiz üçün çox əhəmiyyətlidir. Xüsusilə də Slovakiya tərəfindən Baş Qərvənd kənd tam orta məktəb binasının inşa edilərək Azərbaycan tərəfinə hədiyyə olunması təşəbbüsü iki ölkə arasında dostluq münasibətlərinin günbəgün daha da möhkəmləndirilməsinin sübutudur.

Slovakiya-Azərbaycan arasındakı siyasi əlaqələrin yüksək səviyyədə olması digər sahələrdə də əməkdaşlıq üçün geniş imkanlar yaradır. Azərbaycan və Slovakiya beynəlxalq təşkilatlar çərçivəsində də konstruktiv əməkdaşlıq edir, qarşılıqlı maraq doğuran məsələlər üzrə dialoq aparır və beynəlxalq hüququn prinsiplərinə əsaslanan mövqeləri dəstəkləyirlər.

İki ölkə arasında qarşılıqlı etimada söykənən mövcud əlaqələr gələcək layihələrin uğurla həyata keçirilməsi üçün möhkəm zəmin yaradır. Xüsusilə də enerji sahəsində.Enerji sahəsi Azərbaycan-Slovakiya münasibətlərində xüsusi yer tutur.

Son 5 ildə Azərbaycanın Avropanın enerji təhlükəsizliyinə verdiyi töhfə daha da artıb. Cənub Qaz Dəhlizi vasitəsilə Avropaya təbii qaz ixrac edən Azərbaycan etibarlı enerji tərəfdaşı kimi tanınır. Slovakiya da Avropanın enerji təhlükəsizliyinin möhkəmləndirilməsində Azərbaycanın rolunu yüksək qiymətləndirir. Bu istiqamətdə əməkdaşlığın genişləndirilməsi hər iki ölkənin maraqlarına xidmət edir və Avropanın enerji təminatının şaxələndirilməsinə mühüm töhfə verir. İki ölkə arasındakı mövcud münasibət bərpaolunan enerji sahəsində də yeni əməkdaşlıq imkanları yaranır. Eləcə də tcarət dövriyyəsinin artırılması, investisiyaların təşviqi, sənaye, kənd təsərrüfatı, nəqliyyat və logistika sahələrində əməkdaşlığın genişləndirilməsi hər iki ölkənin gündəliyində duran əsas məsələlərdəndir.

Slovakiya Respublikasının Prezidenti Peter Pelleqrinin ölkəmizə səfəri, Şuşadan səslənən mesajlar göstərdi ki, bu tərəfdaşlığın gələcəyi kifayət qədər geniş perspektivlərə malikdir. İki ölkə arasında dostluq və yüksək səviyyəli əməkdaşlıq qarşıdakı illərdə də siyasi dialoq, iqtisadi əməkdaşlıq, enerji təhlükəsizliyi, bərpa layihələri və regional sabitlik istiqamətində yeni uğurlara zəmin yaradacaq".

Telegramda izləyin