Hovuz suyunda TƏHLÜKƏ: Uşaqlara necə təsir edir?

Hovuz suyunun dezinfeksiyasında xlor mühüm rol oynasa da, onun səviyyəsinin düzgün tənzimlənməsi vacibdir. Xlorun digər maddələrlə reaksiyası nəticəsində yaranan xloraminlər göz, dəri və tənəffüs yollarında qıcıqlanmaya səbəb ola bilər, xüsusilə qapalı hovuzlarda havalandırma da önəm daşıyır.

Bəs, hovuz suyunda xlorun normadan artıq olması uşaqlar üçün hansı sağlamlıq riskləri yarada bilər, valideynlər hovuz seçərkən suyun keyfiyyəti, xlor və pH göstəriciləri, havalandırma və gigiyenik şərait baxımından nələrə diqqət etməlidirlər?
Mövzu ilə bağlı Sonxeber.az-a açıqlama verən pediatr Aytən İsmayılzadə bildirib ki, hovuz suyunda xlorun normadan artıq olması selikli qişaların qıcıqlanmasına səbəb ola bilər:

"Bu, xüsusilə göz, burun, eləcə də qız uşaqlarında cinsiyyət yollarının selikli qişasında qıcıqlanma yarada bilər. Xlorun yüksək miqdarı uşaqlarda tənəffüs yollarının qıcıqlanmasına, öskürək, gözlərdə sulanma, qaşınma və qızartıya səbəb ola, eyni zamanda allergik fonun aktivləşməsinə gətirib çıxara bilər. Bundan əlavə, xlorun normadan artıq istifadəsi orqanizmdə xlor elementinin miqdarının artmasına səbəb ola bilər. Buna görə də hovuzların dezinfeksiyası zamanı xlor yalnız müəyyən edilmiş norma və qaydalara uyğun şəkildə, lazımi miqdarda istifadə olunmalıdır".

Röyalə Xəyal

Telegramda izləyin