Rusiyada vəba yayılır: Azərbaycana keçmə riski varmı? - Ekspertdən AÇIQLAMA

Rusiyada vəba ilə bağlı yayılan məlumatlar fonunda xəstəliyin yayılma yolları və insan sağlamlığı üçün yarada biləcəyi risklər yenidən gündəmə gəlib. Vəba əsasən çirkli su və qida vasitəsilə yayılan, ağır ishal və qusma nəticəsində sürətli susuzlaşmaya səbəb ola bilən infeksiyadır. Ümumdünya Səhiyyə Təşkilatının məlumatına görə, təhlükəsiz su, sanitariya və gigiyena qaydalarına əməl olunması xəstəliyin qarşısının alınmasında əsas tədbirlərdəndir.

Bəs, vəba nə dərəcədə təhlükəli xəstəlikdir, onun yayılmasına əsasən hansı amillər səbəb olur, Azərbaycana yoluxma riskinin qarşısını almaq üçün hansı profilaktik tədbirlər görülməlidir və insanlar vəbanın hansı əlamətlərinə diqqət etməlidirlər?
Mövzu ilə bağlı Sonxeber.az-a açıqlama verən tibb eksperti Şahvələd Məmmədov bildirib ki, vəba və taun təhlükəli infeksion xəstəliklərdir:

"Hazırda Rusiyanın bir neçə bölgəsində, o cümlədən İrkutsk vilayətində xəstəliyin yayılması ilə bağlı məlumatlar var. Azərbaycanda isə əks-epidemik tədbirlər həyata keçirilir və bu istiqamətdə Respublika Epidemioloji Mərkəzi tərəfindən müvafiq işlər görülür. Xaricdən, o cümlədən Rusiyadan gələn vətəndaşlarla bağlı əks-epidemik tədbirlər həyata keçirilir və onların ölkəyə girişinə nəzarət olunur. Düşünürəm ki, hazırda Azərbaycanda karantin rejiminin qüvvədə olması da müəyyən mənada müsbət rol oynayır. Quru sərhədlərin bağlı olması ölkəyə kütləvi insan axınının azalmasına təsir edir. Əsas giriş isə hava nəqliyyatı vasitəsilədir. Bu baxımdan, hazırda Azərbaycan üçün ciddi yoluxma təhlükəsinin olduğunu düşünmürəm. Respublikanın baş epidemioloqu Təyyar müəllim də öz çıxışında yoluxma riskinin aşağı olduğunu qeyd edib. Əks-epidemik tədbirlər yerində görülür və bu barədə bütün respublika və rayon epidemiologiya mərkəzlərinə xüsusi göstərişlər verilib".

Röyalə Xəyal

Telegramda izləyin