Kreml müharibədə dalana dirəndiyini etiraf etdi? Moskva ABŞ-ın mövqeyi ilə razılaşdı

Rusiya-Ukrayna müharibəsində diplomatik həll perspektivləri ilə bağlı yeni açıqlama verilib. Kremlin sözçüsü Dmitri Peskov ABŞ dövlət katibi Marko Rubionun müharibənin strateji dalana dirəndiyi barədə qiymətləndirməsi ilə razılaşdıqlarını bildirib.

Sonxeber.az Reuters-ə istinadən xəbər verir ki, Peskov oktyabrın 8-də Türkmənistanda keçirilən tədbir çərçivəsində jurnalistlərə açıqlamasında diplomatiyanın əsas vəzifəsinin münaqişədən sülh yolu ilə çıxış tapmaq olduğunu deyib.

ABŞ dövlət katibi Marko Rubio oktyabrın 8-də Yunanıstanın Kathimerini nəşrinə müsahibəsində müharibənin strateji dalana dirəndiyini bildirib. Onun sözlərinə görə, belə vəziyyətdən çıxış ya danışıqlar yolu ilə razılaşma, ya da münaqişənin daha da genişlənməsi nəticəsində mümkün ola bilər. Rubio hazırda danışıqlar yolu ilə razılaşma perspektivlərinin zəif olduğunu qeyd edib.

Peskov isə Moskvanın müvəqqəti atəşkəsdən daha geniş, uzunmüddətli siyasi razılaşmaya üstünlük verdiyini vurğulayıb. O, Rusiya Prezidenti Vladimir Putin, Ukrayna Prezidenti Vladimir Zelenski və ABŞ Prezidenti Donald Trampın iştirakı ilə üçtərəfli sammitin yaxın zamanda keçiriləcəyinə dair konkret perspektiv görmədiklərini bildirib.

Ukrayna Prezidenti Vladimir Zelenski isə müharibənin dalana dirənməsi ilə bağlı qiymətləndirmə ilə razılaşmayıb. O, Rusiyaya qarşı iqtisadi təzyiqlərin artırılmasının, sanksiyaların sərtləşdirilməsinin və Ukraynaya əlavə ABŞ dəstəyinin vəziyyətə təsir göstərə biləcəyini deyib.

Bununla yanaşı, Ukrayna nümayəndə heyətinin ABŞ rəsmiləri ilə görüşlərində münaqişənin dayandırılması yolları və hava hücumundan müdafiə sistemlərinə ehtiyac məsələlərinin müzakirəsi gözlənilir.

Beləliklə, Moskva və Vaşinqton müharibənin hazırkı vəziyyətinin mürəkkəbliyi barədə oxşar qiymətləndirmə səsləndirsələr də, münaqişənin dayandırılması şərtləri ilə bağlı tərəflər arasında ciddi fikir ayrılıqları qalır.

Müəllif: İlkin Məmmədkərimov

Telegramda izləyin