Məktəbli forması şagirdlərdə kollektivə aidlik hissini də gücləndirə bilər

"Vahid məktəbli forması şagirdlərin davranışına və məktəbdə nizam-intizama təsir edən amillərdən biri hesab oluna bilər. Eyni geyim qaydasının tətbiqi şagirdlərdə məsuliyyət hissinin formalaşmasına, məktəbin daxili qaydalarına hörmətin artmasına və daha sistemli təhsil mühitinin yaranmasına şərait yaradır". Bu sözləri Sonxeber.az-a açıqlamasında təhsil eksperti Şəmsi Qoca bildirib.
Onun sözlərinə görə, məktəbli formasının əsas üstünlüklərindən biri şagirdlər arasında geyimə görə fərqlərin azalmasıdır: "Müxtəlif qiymətə olan geyimlər, tanınmış markalar və dəb meyilləri bəzən uşaqlar arasında müqayisələrə, hətta sosial fərqlərin qabarmasına səbəb olur. Vahid forma bu cür halların qarşısını müəyyən qədər alaraq şagirdlərin diqqətini xarici görünüşdən daha çox dərslərə və məktəb fəaliyyətinə yönəldə bilər.

Digər tərəfdən, məktəbli forması şagirdlərdə kollektivə aidlik hissini də gücləndirə bilər. Eyni geyim qaydasına əməl etmək məktəbdə ortaq dəyərlərin və məsuliyyət anlayışının formalaşmasına töhfə verir. Şagirdlər məktəbin müəyyən qayda və tələbləri olan təhsil müəssisəsi olduğunu daha aydın dərk edirlər.

Bununla belə, məktəbdə nizam-intizamın təmin edilməsini yalnız vahid forma ilə əlaqələndirmək düzgün olmaz. Şagirdlərin davranışına müəllimlərin münasibəti, məktəbdə qaydaların necə tətbiq olunması, valideynlərin iştirakı və təlim-tərbiyə işinin təşkili də ciddi təsir göstərir. Əgər bu istiqamətlərdə problemlər varsa, vahid geyim formasının tətbiqi həmin problemləri öz-özlüyündə aradan qaldırmayacaq.

Beləliklə, məktəbli forması intizamın təmin olunmasına kömək edən vasitələrdən biri olsa da, əsas nəticə məktəbdə sağlam münasibətlərin, ədalətli qaydaların və qarşılıqlı hörmətin formalaşdırılmasından asılıdır".

Müəllif: İlkin Məmmədkərimov

Telegramda izləyin