"Uşaqların eyni parta arxasında oturarkən bir-birindən geyiminə görə fərqləndirilməməsi vacibdir" - SƏBİNƏ SALMANOVA

Azərbaycanda təhsil sisteminin əsas prinsiplərindən biri bütün hər kəs üçün bərabər və sağlam təhsil mühitinin yaradılmasıdır. Sosial statusundan, ailəsinin maddi imkanlarından, etnik və dini mənşəyindən asılı olmayaraq hər kəs eyni şəraitdə təhsil almalı və eyni imkanlara malik olmalıdırlar. Bu baxımdan vahid məktəbli forması yalnız geyim məsələsi deyil, Azərbaycanda məktəb mühitində bərabərlik, nizam-intizam və vahid təhsil mədəniyyətinin formalaşdırılması baxımından çox əhəmiyyətlidir.

Bu sözləri Milli Məclisin deputatı Səbinə Salmanova Sonxeber.az-a açıqlamasında deyib.

Onun sözlərinə görə, vahid məktəbli forması şagirdlər arasında sosial-iqtisadi fərqlərin geyim vasitəsilə ön plana çıxmasının qarşısını almağa və ayrı-seçkilik risklərini azaltmağa imkan verir:

"Eyni zamanda vahid forma məktəbdə səliqəli və ümumi görünüş mədəniyyətinin yaranmasına, şagirdlərdə kollektivə aidlik və məktəb kimliyi hissinin güclənməsinə müsbət təsir göstərə bilər. Uşaqların eyni parta arxasında oturarkən bir-birindən geyiminə görə fərqləndirilməməsi vacibdir. Bu, onların bir-biri ilə münasibətlərinə də təsir edən amillərdən biridir. Məktəbdə əsas meyar uşağın geyimi və ailəsinin maddi imkanları deyil, onun təhsili və davranışı olmalıdır".

Deputat bildirib ki, məktəbli forması tədris prosesinə, yaş xüsusiyyətlərinə uyğun, rahat və praktik istifadə prinsipləri əsasında müəyyən edilir:

"Burada əsas məqsəd şagirdlərin rahatlığını təmin etməklə yanaşı, məktəb mühitində vahid və səliqəli görünüş yaratmaqdır. Məktəbli forması uşaqların gündəlik təhsil prosesində özlərini rahat hiss etməsinə, sərbəst hərəkət etməsinə imkan verər. Bu baxımdan vahid məktəbli formasının tətbiqi yalnız müəyyən geyim standartının qorunması kimi qiymətləndirilməməlidir. Burada əsas məqsəd məktəbdə sağlam psixoloji mühitin, bərabər münasibətlərin və vahid təhsil mədəniyyətinin formalaşdırılmasıdır".

Telegramda izləyin