Zəfər - milli iradənin, lider qətiyyətinin və dövlətçilik strategiyasının təntənəsidir

Zəfər Günü Azərbaycan tarixinin ən möhtəşəm səhifələrindən biridir. Lakin bu tarixi yalnız 44 günlük Vətən müharibəsinin nəticəsi kimi qiymətləndirmək doğru olmazdı. Çünki 8 Noyabr Zəfəri illərlə aparılan məqsədyönlü dövlət siyasətinin, milli iradənin, siyasi qətiyyətin, hərbi quruculuğun və diplomatik mübarizənin məntiqi yekunu idi.

Əslində, Zəfərə gedən yol xalqla liderin birliyindən başladı. Ulu Öndər Heydər Əliyevin müəyyənləşdirdiyi azərbaycançılıq ideologiyası, dövlətçilik ənənələri və milli birlik fəlsəfəsi bu yolun ideoloji əsaslarını formalaşdırdı. Prezident İlham Əliyev isə həmin siyasi kursu yeni tarixi şəraitdə davam etdirərək Azərbaycanın güclü dövlətə çevrilməsini təmin etdi.
Bu prosesdə ən mühüm amillərdən biri xalqın öz liderinə inamı, dövlətin siyasi iradəsi və cəmiyyətin milli məqsəd ətrafında səfərbər olunması idi. Eyni zamanda, vətənpərvərlik ruhunda yetişən yeni nəsil formalaşdı. Azərbaycan gəncliyi Vətən sevgisini yalnız sözlə deyil, əməli fəaliyyəti, fədakarlığı və qəhrəmanlığı ilə nümayiş etdirdi. Bu gün Zəfərin əsas qəhrəmanları sırasında məhz həmin gəncliyin nümayəndələri dayanır.

Digər tərəfdən, Azərbaycan illər ərzində hərbi qüdrətini sistemli şəkildə artırdı, müasir silahlarla təchiz olundu, peşəkar ordu quruculuğunu həyata keçirdi. Bununla paralel olaraq diplomatik cəbhədə də ardıcıl mübarizə aparıldı. Azərbaycan beynəlxalq hüququn norma və prinsiplərinə əsaslanaraq öz ərazi bütövlüyünün bərpası məsələsini daim dünya gündəliyində saxladı. Qarabağ münaqişəsinin mahiyyətinin, Azərbaycanın suveren hüquqlarının və ərazi bütövlüyünün beynəlxalq səviyyədə tanınması istiqamətində uzun illər ciddi siyasi-diplomatik fəaliyyət göstərildi.

Bütün bunlar 2020-ci ildə tarixi məqam yetişəndə öz nəticəsini verdi. 44 günlük Vətən müharibəsi Azərbaycan dövlətinin siyasi iradəsinin, ordusunun döyüş qabiliyyətinin və xalqın sarsılmaz birliyinin real gücünü nümayiş etdirdi.

Burada xüsusi vurğulanmalı məqam Prezident, Ali Baş Komandan İlham Əliyevin strateji qərarvermə məharətidir. Müharibədə yalnız nə vaxt hərəkətə keçməyi bilmək deyil, hansı məqamda və hansı şərtlərlə dayanmağın zəruriliyini müəyyənləşdirmək də böyük siyasi və hərbi liderlik tələb edir. Azərbaycan Ordusunun uğurlu əməliyyatları, Ali Baş Komandanın qətiyyətli rəhbərliyi və hər bir mərhələdə verilən düzgün qərarlar Zəfərin əldə olunmasında həlledici rol oynadı.

Şuşanın azad edilməsi ilə müharibənin taleyi həll olundu. 10 noyabr 2020-ci il Bəyanatı ilə hərbi əməliyyatlar dayandırıldı və Azərbaycan özünün əsas strateji məqsədlərinə nail oldu. Bu, təkcə hərbi qələbə deyil, həm də siyasi-diplomatik üstünlüyün təsdiqi idi.

Lakin Azərbaycanın qarşısında daha böyük tarixi vəzifə dayanırdı: dövlət suverenliyinin ölkənin bütün ərazisində tam bərpası. Prezident İlham Əliyevin qətiyyətli siyasəti nəticəsində 2023-cü ilin sentyabrında həyata keçirilən antiterror tədbirləri ilə bu tarixi missiya da başa çatdı. Beləliklə, Azərbaycan ərazi bütövlüyünü və dövlət suverenliyini tam təmin edərək bütöv və suveren dövlət modelini reallaşdırdı.

Bu gün biz artıq yalnız Qarabağın azad edilməsindən deyil, Azərbaycanın yeni geosiyasi və tarixi reallıqlar formalaşdırmasından danışırıq. Qarabağın dirçəldilməsi, Böyük Qayıdış, yeni infrastrukturun qurulması və bölgənin iqtisadi həyata inteqrasiyası Zəfərin davamı olan quruculuq mərhələsidir.

Əminliklə demək olar ki, Prezident İlham Əliyev Azərbaycan tarixinə yalnız müharibədə qələbə qazanan dövlət başçısı kimi deyil, həm də Qarabağın azad edilməsinə və ölkənin ərazi bütövlüyü ilə dövlət suverenliyinin tam bərpasına nail olan lider kimi daxil olub. Onun tarixi missiyası Qarabağ fatehi obrazında, milli dövlətçilik tariximizin yeni mərhələsinin müəllifi kimi təcəssüm olunur.

Zəfər Gününün əsas fəlsəfəsi budur: xalqın birliyi, liderin qətiyyəti, ordunun gücü və dövlətin strateji iradəsi bir məqsəd ətrafında birləşəndə tarix dəyişir. Azərbaycan xalqı bu tarixi özü yazdı. 8 Noyabr isə həmin tarixin əbədi Zəfər simvoludur.

Bəhruz Quliyev, Səs qəzetinin baş redaktoru, siyasi ekspert

Telegramda izləyin