"Powerbank"dakı gizli düymə nə üçündür?

Smartfonların enerjisini istənilən yerdə doldurmağa imkan verən portativ enerji cihazları gündəlik həyatımızın ayrılmaz hissəsinə çevrilib. Lakin powerbank istifadəçilərinin çoxu cihazın üzərindəki kiçik düymənin əslində hansı funksiyaları yerinə yetirdiyini bilmir.

Lent.az xarici mediaya istinadla xəbər verir ki, powerbank üzərindəki düymə yalnız cihazı işə salmaq üçün nəzərdə tutulmayıb. Modelindən asılı olaraq, bu düymə bir neçə fərqli funksiyanı yerinə yetirə bilər.

Powerbank üzərindəki düymə nə üçündür?

Müasir portativ enerji cihazlarının əksəriyyətində düymə enerji ötürülməsini aktivləşdirmək və ya cihazı gözləmə rejimindən çıxarmaq üçün istifadə olunur. Bəzi modellər smartfon qoşulan kimi avtomatik enerji ötürməyə başlayır. Digərlərində isə enerji doldurma prosesinin başlaması üçün düyməyə bir dəfə basmaq lazımdır.

Bundan başqa, müəyyən modellərdə düyməni uzun müddət basılı saxlamaq enerji ötürülməsini dayandırmağa imkan verir. Bu funksiya xüsusilə powerbanka USB ventilyatoru, portativ lampa və ya digər kiçik elektron cihazlar qoşulduqda faydalı ola bilər.

Powerbankın nə qədər enerjisi qaldığını necə bilmək olar?

Düymənin ən geniş yayılmış funksiyası batareyanın enerji səviyyəsini göstərməkdir. Düyməyə basdıqda cihazın üzərindəki işıq göstəriciləri yanır və təxmini enerji səviyyəsini göstərir. Dörd işığın yanması batareyanın demək olar ki, tam dolu olduğunu bildirir. Üç işıq enerji ehtiyatının yüksək, iki işıq isə təxminən yarı səviyyədə olduğunu göstərir.

Yalnız bir işıq yanırsa, bu, powerbank-ın enerjisinin azaldığını və yaxın zamanda doldurulmalı olduğunu bildirir. Rəqəmsal ekranı olan modellərdə isə düyməyə basdıqda qalan enerji faizi ekranda görünür.

Düymənin çoxlarının bilmədiyi əlavə funksiyaları

Bəzi powerbank modellərində eyni düymə bir neçə xüsusi rejimi aktivləşdirə bilir. Məsələn, düyməyə iki dəfə basmaq və ya onu bir neçə saniyə basılı saxlamaqla zəif cərəyan rejimini işə salmaq mümkündür. Bu rejim simsiz qulaqlıqların, ağıllı saatların və fitnes qolbaqlarının enerji ilə doldurulması üçün nəzərdə tutulub.

Bəzi cihazlarda düymə simsiz enerji doldurma funksiyasını aktivləşdirir. Digər modellərdə isə daxili fənəri yandırmaq, söndürmək və ya cihazın işində yaranan müəyyən nasazlıqlardan sonra onu yenidən işə salmaq üçün istifadə edilir. Lakin bu funksiyalar bütün powerbank-larda mövcud deyil.

Niyə bütün powerbanklarda düymə eyni işləmir?

Mütəxəssislər bildirirlər ki, portativ enerji cihazlarının düymələri üçün vahid standart yoxdur. Bir istehsalçının cihazında düymə yalnız enerji səviyyəsini göstərdiyi halda, başqa modeldə bir neçə funksiyanı idarə edə bilər. Buna görə də yeni powerbank aldıqda onun istifadə təlimatını oxumaq tövsiyə olunur.

Telefon niyə bəzən powerbank-a qoşulduqda enerji toplamır?

Bunun səbəblərindən biri cihazın avtomatik enerji ötürmə funksiyasının olmaması ola bilər. Belə hallarda düyməyə qısa müddət basmaqla enerji doldurma prosesini aktivləşdirmək mümkündür. Əgər telefon yenə enerji toplamırsa, kabelin, USB girişinin və powerbank-ın enerji səviyyəsinin yoxlanılması məsləhətdir.

Mütəxəssislər xatırladırlar ki, kiçik görünən bu düymə cihazın gündəlik istifadəsini xeyli asanlaşdıra bilər. Onun bütün imkanlarını öyrənmək üçün isə konkret modelin təlimatına baxmaq kifayətdir.

Telegramda izləyin