SOS! Bu siqaretləri almayın

İnsanların sağlamlığı xeyrinə qəbul olunmuş qanunların icrası mümkün olmur.

Bu sözləri Azad İstehlakçılar Birliyinin sədri Eyyub Hüseynov Azərbaycanda yetkinlik yaşına çatmayanlara siqaretin satışı və istifadəsini qadağan edən qanun layihəsi haqda danışarkən deyib.

Onun sözlərinə görə, bu layihənin icrası gizli satışların artmasına təkan verəcək:

"Qanun layihəsinə görə, siqaret almaq üçün şəxsiyyət vəsiqəsi tələb olunacaq. Düşünürəm ki, bunun icrası mümkün deyil. Çünki insanların sağlamlığı xeyrinə qəbul olunmuş qərarların icrası çox vaxt mümkün olmur.

Sahibkarların toxunulmazlığı şəraitində qaçaqmal siqaretlər sayı durmadan artır. Marketlərdə adamları siqaretlər qarşılayır. Ona görə də gözə girən siqaret piştaxtalarını yığışdırmaq, yaxud üstünü örtmək lazımdır ki, siqaretlər görünməsin.

Ekspertiza nəticəsində məlum olub ki, Şəkidə istehsal olunan "Piramida", "Karvan" siqaretlərinin tərkibində olan təhlükəli maddələrin miqdarı normadan çoxdur. Qadağan olunmasına baxmayaraq, hazırda bir çox yerlərdə bu siqaretlərin satışı həyata keçirilir. Süleyman Rəhimov 188, 3-cü mikrorayon dairəsi və digər yerlərdə bu cür təhlükəli siqaretlər dənə ilə 40 qəpiyə satılır. Alıcılar isə daha çox məktəblilərdir. Halbuki hələ 2001-ci ildən siqaretlərin tək-tək satışı qadağan olunmuşdu".

Siqaret və alkoqollu içkilərinin ixracına görə lisenziyanın ləğv edilməsi haqda danışan E.Hüseynov bunun müsbət addım olduğunu bildirib:

"Yerli məhsulların xaricə çıxması baxımından uğurlu addımdır. Bununla paralel olaraq ölkəyə idxal olunan məhsullara da nəzarət gücləndirilsə, qaçaqmal yolu ilə gətirilən təhlükəli məhsulların qarşısı alınar".

Xatırladaq ki, yeni hazırlanmış qanun layihəsinə görə, Azərbaycanda yetkinlik yaşına çatmayanlara tütün məmulatlarının (siqaret) satışı, yetkinlik yaşına çatmayanların tütün ticarətinə cəlb edilməsi qadağan edilir. Bundan sonra bütün satış məntəqələrində tütün məmulatlarının satışı zamanı yaş həddinin müəyyənləşdirilməsi üçün şəxsiyyəti təsdiq edən sənəd tələb olunacaq.

Həmçinin qanun dəyişikliyinə əsasən alkoqollu içkilərin və tütün məmulatlarının ixracı zamanı xüsusi razılıq sənədi (lisenziya) tələb olunmayacaq.

Mənbə:axar.az

Telegramda izləyin