Azərbaycanda qatardan qaçan məhbuslar "Lotu Quli"nin adamları olub? - CAVAB

"Bakı-Astara-Bakı qatarında xüsusi təyinatlı vaqonla paytaxtda gətirilən zaman qaçan məhbuslar Əli Ağami və Etibar Məmmədov "Lotu Quli" kimi tanınan Nadir Səlifovun yaxın adamları deyil".
Bunu açıqlamasında "Lotu Quli"nin vəkili Təranə Əliyeva deyib.
Onun sözlərinə görə, qatardan qaçan məhbusların N.Səlifovun yaxın adamları olması ilə bağlı mətbuatda yazılanlar yanlışdır: "Biz bilmirik ki, mətbutada niyə həmin şəxsləri Nadir Səlifovun yaxın adamları kimi qeyd edirlər".
Xatırladaq ki, Bakı-Astara-Bakı qatarında xüsusi təyinatlı vaqonla paytaxtda gətirilən məhbuslar Əli Ağami və Etibar Məmmədov qaçıblar. Qəsdən adam öldürmədə təqsirləndirilən Ə.Ağami və E.Məmmədovun cinayət işinə Lənkəran Ağır Cinayətlər Məhkəməsində baxılır. Ötən həftə dövlət ittihamçısı onların hər birinin ayrı-ayrılıqda 19 il müddətə azadlıqdan məhrum edilməsini istəyib. Hər iki şəxs oktyabrın 22-də gecə Lənkərandan Bakıya qatarla gətirilib. Oktyabrın 23-də səhər saatlarında Biləcəri stansiyasında E.Məmmədovla Ə.Ağami qatardan düşürülən zaman qaçıblar.
Təqsirləndirilən şəxslər Bakı İstintaq Təcridxanasına aparılırmış.
Kriminal aləmdə tanınan Ə.Ağaminin hazırda həbsdə olan "Lotu Quli"yə yaxın şəxslərdən olduğu bildirilir. "Qoca" ləqəbli E.Məmmədov isə daha çox Etibar Hacıqabulski kimi tanınır.
Faktla bağlı Baş Prokurorluğun Ağır Cinayətlərə Dair İşlər üzrə İstintaq İdarəsində Cinayət Məcəlləsinin 304.2-ci (azadlıqdan məhrum etmə yerindən, həbsdən və ya mühafizə altından qaçma) və 308.2-ci (vəzifə səlahiyyətlərindən sui-istifadə) maddələri ilə cinayət işi başlanıb. Hazırda başlanmış cinayət işi üzrə və qaçan məhbusların tutulması istiqamətində istintaq əməliyyat-axtarış tədbirləri davam etdirilir.
Hadisə ilə bağlı qarovul rəisi Ceyhun Səmədov, qarovul rəisinin müavini Fuad Hacıyev və qarovul rəisinin digər müavini Tural Poladxanov istintaqa cəlb edilib.

Mənbə: report.az

Telegramda izləyin